AQŞ elçisi Con Tefft Halqara forum kelecek sene keçirilecegine ümüt bildirdi

05 Oktâbr 2011

“Bugünki körüşüv er kes içün ğayet faydalı olğanını qayd etmek isteyim. Bu, bugünde-bugün öz Vatanına qaytayatqan qırımtatar halqınıñ aktual meselelerini muzakere etmek maqsadınen er keske beraber toplanmaq içün acayip bir imkân yarattı. Biz de bu problemler aqqında bilemiz”, -dedi Amerika Qoşma Ştatlarınıñ Ukrainadaki Vefqulade ve Tolu vekâletli elçisi Con Tefft, Qırımtatar halqı Meclisi yolbaşçılarınıñ 2011 senesi oktâbr 5 künü elçiler ve Ukrainada akkreditatsiya etilgen halqara teşkilâtlarnıñ vekilleri ile körüşüviniñ neticelerine yekün çekerek.

Cenap Tefft bildirgenine köre, yaqın vaqıtta halqara ekspertler Qırımğa kelip, qırımtatarlar toplu yaşağan qasabalarnı ziyaret etmek ve halqnıñ problemlerinen şahsen tanışmaq maqsadındalar. Amerikalı diplomatnıñ fikrince, halqara ekspertler tarafından qabul etilgen bu qarar maqsadğa uyğundır, çünki “sürgünlikten qaytqanlarnıñ meseleleri nasıl çezilgenini yerinde körmek” ğayet müimdir.

Bundan da ğayrı Qırımtatar halqınıñ öz Vatanında aq-uquqlarını ğayrıdan tiklemek, onıñ Ukrainada telükesizligi ve inkişafını teminlemek boyunca halqara forumnı keçirüvniñ istiqballeri hususında aytırken, AQŞ elçisi Con Tefft Halqara forum kelecek sene keçirilecegine ümüt bildirdi
“Men öz tarafımdan yolbaşçılarıma bu körüşüvde muzakere olunğan meseleler ve olarnıñ kelecekte nasıl çezilecegi aqqında esabat beririm. Biz bu işni diqqat ile nezaret etemiz”, – qayd etti C. Tefft.