Aqmescitte qırımtatar tili ve edebiyatı boyunca cumhuriyet olimpiadası ötkerildi

14 Mart 2012

Tasil ve ilim nazirligi emirine binaen er yılı fenler boyunca olimpiadalar olıp keçe.

Olar arasında qırımtatar tili ve edebiyatı boyunca olimpiada öz yerini tuta.

2011-2012 oquv yılınıñ noyabr ayında Qırımnıñ er bir mektebinde olimpiadanıñ 1-nci basamağı, soñra dekabr-yanvar aylarında rayon ve şeerlerde 2-nci basamağı keçirildi. Yanvar ayında olimpiadanıñ neticeleri belli olğan soñ 1, 2, 3-nci yerlerni alğan talebeler cumhuriyet olimpiadasınıñ 3-nci basamağında iştirak etmek içün arizalar berdiler. Bu sene olimpiadanıñ 3-nci basamağı mart 10 künü Aqmescit şeeriniñ 42-nci mektebinde olıp keçti.

Olimpiadağa Qırımnıñ er bir köşesinden 186 (9, 10,11 sınıf) talebeleri öz ocalarınen keldiler.

Qırım Tasil ve ilim nazirligi Qırımtatar tilinde tasil sektorınıñ müdiri Zarema Suleymanova, KRİPPO Qırımtatar tilinde tasil inkişafı usuliy laboratoriyasınıñ müdiri Melek Alidinova, jüri reisi, filologiya ilimleri namzeti Leylâ Asanova, mektep müdiri Nariman Ahmedov ve digerleri Olimpiada iştirakçilerini samimiy hayırlap, işlerinde muvafaqiyet tilediler.

Er sene Olimpiadağa sponsorlıq yapqan Milliy Meclis medeniyet ve tasil idaresi em de “Maarifçi” birleşmesi adından TMU Qırımtatar edebiyatı kafedrasınıñ müdiri, dotsent Şevket Yunusov er kesni selâmlap, ana tilimizniñ emiyeti aqqında çıqış yaptı ve maarifçiler bu sene de Cumhuriyet bilgi yarışına qol tutqanını qayd etti. O, maarifçiler balalarımıznıñ ana tiline olğan sevgisi, güzel tilimiz ve qırımtatar edebiyatını daa ziyade bilmege tırışqanlarını köz ögüne alıp, er bir talebeni qıymetli kitapnen rağbetlendirmek qararını alğanlarını bildirdi ve belli qırımtatar yazıcılarımıznıñ acayip eserlerini genç til ve edebiyat faallerine bağışladı.

Olimpiada iştirakçilerini hayırlamağa kelgen Amethan-Sultan müzeyiniñ ilmiy hadimi Server Tairov özüniñ “Qırımtatarlar: qadim zamanlardan bugünge qadar” kitabını yaqın künlerde milliy mekteplerimizge ediye etecegi aqqında aytıp, balalarğa Alla qolay ketirmesini tiledi.

Tantanalı qısım yekünlengen soñ, olimpiada nizamnamesine köre talebeler qırımtatar tilinden test keçtiler ve edebiyattan küçük bir inşa yazdılar. Testler talebelerniñ til, inşa ise edebiyat bilgisini kösterdi. Ğalip çıqqan talebelerniñ soyadları bu künleri belli olacaq. Nizamname boyunca 186 talebeden 30 fayızı taqdirlenmeli.