Aqmescitte qırımtatar halqınıñ lideri Mustafa Cemilevniñ ömüri ve faaliyetine bağışlanğan sergi açıldı

02 Dekabr 2013

Aqmescitte Qırımtatar sanat müzeyinde dekabr 2 künü qırımtatar halqınıñ lideri, dünyaca belli uquqqorçalayıcı, SSSRde insan aqlarını qoruv boyunca teşebbüsçi gruppanıñ tesisçisi, Ukraina halq deputatı, 2013 senesi noyabr 13 künü 70 yaşını toldurğan Mustafa Cemilevniñ ömüri ve faaliyetine bağışlanğan “Halqıma duanen” sergi açıldı.

Qırım medeniyet nazirligi, Qırımtatar sanat müzeyi ve Qırımtatar qadın-qızlar ligası teşkilâtlandırğan sergide seyircilerniñ diqqatına Mustafa Cemilevniñ şahsiy kollektsiyasından sergi çalışqan devirge berilgen 200-den ziyade eksponat – resimler, mukâfat, yarlıq, vesiqa ve medaller taqdim olundı.

Sergi açılışında Ukraina halq deputatı, qırımtatar halqınıñ lideri, sergi qaramanı Mustafa Cemilev, onıñ refiqası, Qırımtatar qadınlar ligasınıñ reisi Safinar Cemileva, Milliy Meclis reisi Refat Çubarov, Qurultay Merkeziy saylav komissiyasınıñ reisi Zair Smedlâyev, Qurultay Teftiş komissiyasınıñ reisi Ali Özenbaş, Meclis azaları Riza Şevqiyev ve Mustafa Mauşev, Qırım cemaatçılığınıñ vekilleri iştirak ettiler.

“Sayğılı dostlar, milliy küreşimiz devamında milliy meselemizniñ çeziminen bağlı bir çoq vaqialar olıp keçti, amma biz daima demokratik printsiplerge köre areket ettik ve bugün de olarğa esaslanaraq iş köremiz, – dedi Mustafa Cemilev. – Aynı şu sebep ile qırımtatar halqınıñ miliy areketi dündaki diger milliy areketler içün ibret oldı. Şunı qayd etmeli ki, eger bizim areketimiz birlikli olmasaydı, bugün biz böyle neticelerni elde etmez edik”.

Meclis reisi Refat Çubarov öz nevbetinde er kesni sergi açılışınen hayırladı. “Bugün mında epsi eksponatlar sergilenmegenine baqmadan, bu serginiñ halqımız içün emiyeti kerçekten de büyüktir”, – dedi Refat Çubarov. – Qırımtatar halqı milliy areketi lideriniñ ömüri ve faaliyetine bağışlanğan sergi milliy areketniñ tarihımızdaki rolüni köstermekte”

Bunıñ kibi de o, qayd etti ki, halqnıñ tarihı aqqında öz ömürini halqı ve Vatanına bağışlağan insanlar aqqında aytmadan ikâye etmek olmaz. “Mustafa ağanıñ milliy areketimiz içün yapqan hızmetiniñ qıymeti ölçüsizdir, – dep qayd etti Meclis reisi. – O, er keske areketniñ maqsadını añlatmağa tırıştı ve men eminim ki, kelecekte tarihçılar yapılğan işniñ talilini yaparlar”

R.Çubarov sergini teşkil etmege yardımda bulunğanlarğa teşekkür bildirip, bu kibi sergilerni gençlerge añlatmaq içün milliy mekteplerde keçirmekni teklif etti.

“Halqıma duanen” sergi Qırımtatar sanat müzeyinde Aqmescit şeeri, Çehov soqağı 17 adresi boyunca üç afta devam etecek.