Aqmescitte Qırımtatar halqı VI çağırılış Qurultayınıñ 1-nci sessiyası öz işini başladı

26 Oktâbr 2013

2013 senesi oktâbr 26 künü Aqmescitte Qırımtatar halqı VI çağırılış Qurultayınıñ 1-nci sessiyası öz işini başladı.

Sessiyanı açıq dep ilân etken Qurultay Merkeziy saylav komissiyasınıñ reisi Zair Smedlâyev salonda Qurultaynıñ 241 delegatı qayd etilgenini bildirdi.

Qurultay oturımında Türkiye, Romaniya, Amerika, Rusiye, Qazahistan, Almaniya, Qırğızstan, Frenkistan ve Poloniyadaki diaspora vekilleri, bunıñ kibi de devlet ve cumhuriyet aikimiyeti, siyasiy firqalar ve cemaat teşkilâtlarınıñ, Avropa Birliginiñ Ukrainadaki vekilleri iştirak eteler.

Sessiya Ukraina devlet ve milliy gimnler ile başlandı. Milliy gimn Qırımtatar akademik muzıkalı-drama teatriniñ artistleri Emine Cevdetova ve Seytabla Memetovnıñ icrasında yañğıradı. Qırım musulmanlarınıñ müftisi acı Emirali Ablayev ise Qurultay işiniñ yahşı keçmesi içün dua oqudı.
Qurultay delegatları Qurultay işçi organlarını seçmege kiriştiler.

Oturım prezidiumına Mustafa Cemilev, Refat Çubarov, Remzi İlyasov, Saniye Ametova, Seytasan Asanov ve Zair Smedlâyev saylandılar.

Bunıñ kibi de Qurultay delegatları Dilâver Akiyev, Ayder Acimambetov, Diana Seytgaziyeva, İlyas Muzafarov, Şefiqa Abduramanova ve Pevziye Mamutovadan ibaret oturım kâtibiyetini seçtiler.

Muarririyet komissiyasına Bekir Mamutov, Teyfuq Gafarov, Emirasan Ümerov, Şevket Qaybullayev, Eskender Bariyev, Elvedin Çubarov, Rustem Abduqadırov ve Gayana Yüksel kirsetildiler.

Mandat komissiyası terkibine Qurultay delegatları Server Kökçeyev, Şemsunur Mambedaliyeva, Nariman Nuftulayev, Emin Avamilev ve Muzafar Karauseinovnı sayladılar.

Qurultay delegatları oturımnıñ kün tertibini tasdiqladılar.

Esas olaraq 6 meseleden ibaret kün tertibi alındı.

Qırımtatar halqı VI çağırılış Qurultayı 1-nci sessiyasınıñ kün tertibi qabul etildı.

1. Ukrainada içtimaiy-siyasiy vaziyet ve milliy idare organları ve qırımtatar halqı milliy vekâletligi sisteminiñ qırımtatar halqınıñ aqlarını ğayrıdan tiklev boyunca vazifeleri aqqında

2. Qırımtatar halqı Qurultayı, onıñ saylanma organları ve yerli milliy idare organlarınıñ faaliyeti ve teşkilâtını közetken vesiqalarğa deñişme ve qoşumcalar kirsetüv aqqında.

3. Qırımtatar halqı Qurultayınıñ saylanma organları ve onıñ vazifedar şahıslarını seçüv aqqında.

4. Qırımtatar halqınıñ öz Vatanında aqlarını ğayrıdan tiklev, Ukrainada onıñ telükesizligi ve inkişafını temin etüv boyunca halqara forumğa azırlıq aqqında.

5. Qırımtatar halqı soyqırımınıñ 70 yıllığı munasebetinen qırımtatar halqı milliy idare organları, icadiy ve cemaat teşkilâtlarınıñ vazifeleri aqqında.

6. Qırımtatar halqı Qurultayınıñ vesiqalarını qabul etüv aqqında.

Refat Çubarov Qurultay delegatları adına Ukraina Yuqarı Şurasınıñ reisi Vladimir Rıbaknıñ, reis muavini Ruslan Koşulinskiy, Sotsial siyaset naziri Natalya Korolevskaya, Ukraina Medeniyet naziri Leonid Novohatko, ve “Udar Vitaliya Kliçko” siyasiy firqanıñ lideri Vitaliy Kliçkodan kelgen hayırlavlarnı oqup eşittirdi.

Ukrainada siyasiy-içtimaiy vaziyet ve milliy idare organları, qırımtatar halqı milliy temsilciligi sistemasınıñ qırımtatar halqınıñ aqlarını ğayrıdan tiklev saasındaki vazifeleri aqqında maruzanen Meclis reisi Mustafa Cemilev çıqışta bulundı.