Aqmescitte qırımtatar halqı soyqırımı qurbanlarınıñ hatırasına bağışlanğan «Qalbiñde ateş yaq» aktsiyası keçirildi

17 May 2013

Qırımtatarlar tarihında facialı künniñ arfesinde Aqmescitniñ merkeziy meydanında ananeviy “Qalbiñde ateş yaq” aktsiyası keçirildi.

Tedbirni Qırımtatar Milliy Meclisiniñ qoltutuvında Qırımtatar yaşlar merkezi teşkilâtlandırdı. Aktsiyada 3 biñden ziyade çeşit millet, dinlerge mensüp olğan yaş ve qart insan iştirak etti.

Sürgünlikte elâk olğanlarnıñ hatırasını añmaq içün Meclis reisi Mustafa Cemilev, Meclis azaları, milliy areket veteranları, Qırımnıñ sakinleri ve musafirleri keldiler. Aktsiya keçirilgen vaqıtta qırımtatar sanatçıları sürgünlik aqqında yırlarnı muzıkasız icra ettiler.

Sana yanında ekranda sürgünlik, nasıl etip insanlarnı 1944 senesi mayıs 18-te sürgün etkenleri aqqında vesiqalı film numayış etildi, Bu insanlarnıñ bir çoqları o yılı daa bala olsalar da bu qara kün olarnıñ qalplerinde silinmez iz qaldırdı.

Mumlar yaqılğan soñ er kes olardan içinde 69 raqamı olğan yarımada şekili ve qırımtatarlarnıñ temsili olğan tamğa tizilgenini körebildi. Bunıñ kibi de mumlardan “No genocide” sözlerini ve aynen yıldız şekili yapılğanı köründi.

Aktsiyadan soñ teşkilâtçılar er keke minnetdarlıq bildirip, yaşlarnıñ bu teşebbüsi siyasetten tış aktsiya olğanını tekrar hatırlattılar.

Şunı da qayd etmeli ki, Aqmescitten ğayrı bu aktsiya Qarasuvbazar, Sudaq, Aluşta ve Çernomorskoye qasabasında da keçirildi.

Mezkür aktsiya birinci sefer Aqmescitte 2007 senesi Qırımtatar yaşlar merkezi tarafından teşkil etilip, ondan berli er yılı ötkerile.