Aqmescitte Qırımtatar halqı Meclisi ve regional meclis reisleriniñ kenişletilgen toplaşuvı olıp keçti

02 May 2013

Kün tertibine qoyulğan esas meseleler: Hıdırlez milliy bayramına azırlıqnıñ ketişatı aqqında; qırımtatar halqı soyqırımı qurbanlarınıñ hatırasına ve sürgünlikniñ 69 yıllığına bağışlanğan matem tedbirleri aqqında; 2013 senesi aprel 27-28 künleri yedi regionda Qırımtatar halqı Qurultayına delegatlarnı saylav aqqında; Meclis azalarınıñ Avropa Birligi azası olğan devletler, Amerika Qoşma Ştatları ve Türkiyedeki qırımtatar cemiyetleri yolbaşçılarınen toplaşuvı aqqında.

Hıdırlez milliy bayramına azırlıqnıñ ketişatı boyunca esabatnen Teşkiliy komitet reisi Emine Avamileva çıqıştı bulundı  “Azırlıq işleri deyerlik soñuna keldi, sadece ufaq-tüfek işler qaldı, – bildirdi Emine Avamileva bu yılı Hıdırlez bayramındaki tedbirlerni hatırlataraq. Ve şunı da qayd etti ki, Camala, Enver İzmaylov ve Femi Mustafayev kibi meşur ukrain sanatçıları bayramnıñ musafirleri olacaqlar. Emine Avamilevanıñ haber etkenine köre “Acele yardım”, ateş söndürici maşinalarınen teminlev ve suv taşımaq meselesi boyunca Bağçasaray rayon devlet memuriyetinen kelişildi.

2013 senesi mayıs 18 künü keçirilecek Qırımtatar halqı soyqırımı qurbanlarınıñ hatırasına ve sürgünlikniñ 69 yıllığına bağışlanğan matem tedbirlerini azırlav hususında Meclis azaları qırımtatarlardan ibaret beş kolonnanı tizmek ve olarnıñ mayıs 18 künü Aqmescitniñ merkeziy meydanına taba areketleri tafsilâtlı muzakere etip, er bir kolonna içün mesülietliler tayinlendi

Mayıs 18 künü Bütünqırım matem mitingi başlanmazdan evel Aqmescitniñ demiröl vokzalındaki hatıra taşı ve Salğır bagçasında sürgünlik qurbanlarına abide yanında da mitingler keçirilecek.

Saat 12-de “Matem ve Birlik daqqası” Halqara aktsiyası keçirilecek. Bundan soñ kolonnalar Aqmescitniñ soqaqlarından ketip, episi kolonnalar merkeziy meydanda toplanğan soñ sürgünlik ve on yıllarnen ğurbet illerde zorluqnen tutulğanı aqibetinde qırımtatar halqı soyqırım qurbanlarınıñ hatırasına bağışlanğan Bütünqırım matem mitingi ötkerilecek. Mayıs 17 künü ise Aqmescitniñ merkeziy meydanında “Qalbiñde ateş yaq” er yıllıq aktsiya olacaq.

Qırımtatar halqı soyqırım qurbanlarınıñ hatırasına bağışlanğan matem tedbirlerini azırlav boyunca teşkiliy komitetke tedbirler planını siyasiy-içtimaiy vaziyet köz ögüne alınğanı alda, Qırımtatar halqı Meclisi Prezidiumınıñ nevbetteki toplaşuvında tasdiqlamaq içün qaviy işlemek avale etildi.

“Bazı malümatlarğa köre mayıs 18 kününe “alternativ miting” keçirmek planlaştırılğan”, – dedi Meclis reisi Mustafa Cemilev, mayıs 18 matem tedbirleri boyunca çıqışta bulunırken. – Qırım Nazirler şurasınıñ matem tedbirlerini azırlav boyunca teşkiliy komitetniñ soñki toplaşuvında bir qaç mesele baqılğan. Meselâ, “Milli Firqa” öz mitingini keçirmek istey. Amma o olurmı, yoqmı – bilmeyim”.

Bütünqırım matem mitinginde devlet ve cumhuriyet ükümeti vekilleriniñ iştirakine izaat bergen Meclis yolbaşçısı dedi ki, Qırımtatar halqınıñ Meclisi iç bir kimsege resmiy davetname yollamadı.

“Ebet, Qırım Nazirler şurasınıñ reisi A. Mogilöv ve digerleri mayıs 18 künü meydandaki minberden çıqışta bulunmağa isteyler, amma insanlar bunı nasıl qabul eteceklerini aytıp olamamız. Olarğa nisbeten bizde iç bir türlü ğarezlik yoqtır, – dedi Cemilev. – Lâkin biz öz nevbetimizde soñki vaqıtta Qırımda olıp keçken vaqialar boyunca fikirlerimizni bildirmek niyetindemiz, demek insanlarnıñ ağızlarını qapatmağa iç kimseniñ aqqı yoqtır. Mayıs 18 – bizim itçün eñ facialı kündir”

M.Cemilevniñ söylegenine köre bu sene Bütünqırım matem mitinginde Ukrainada akkreditatsiya etilgen halqara teşkilâtlar vekilleriniñ, ukrain siyasiy partiyalar ve tepşkilât azalarınıñ iştiraki beklenilmekte. Bunıñ kibi de Türkiye, Romaniya, AQŞ, Rusiye ve diger devletlerdeki qırımtatar diasporası vekilleri de keleceklerini bildirdiler.

Meclis azalarına mayıs 4-te Aqmescitte Avropa Birligi azası olğan devletler, Amerika Qoşma Ştatları ve Türkiyedeki qırımtatar cemiyetleri yolbaşçıları ile olacaq toplaşuv aqqında haber etildi. “Toplaşuvda qırımtatar halqınıñ vaziyetine dair meseleler muzakere etilip, qırımtatar halqı aqlarınıñ ğayrıdan tiklenilmesi oğrunda beraberlikte yapılacaq areketler boyunca qararlar alınacaq”, – qayd etti Meclis reisi M.Cemilev.

Aprel 27-28 künleri Bağçasaray, Qurman, Aqmeçet, Qarasuvbazar, Canköy, İçki ve Aqyar regionlarında Qurultayğa delegatlarnı saylavnıñ neticeleri aqqında Qurultay delegatlarını saylav boyunca merkeziy komissiyanıñ reisi Zair Smedlâyev bildirgenine köre Merkeziy saylav komissâiyası tarafından qayd etilgen regionlardan tüşken ve işlenilgen malümatlar boyunca cedvelge alınğan 110 delegatlıqqa namzetlerden 60- neferi 6-ncı çağırılış Qurultayınıñ delegatı olaraq seçildi.

“Saylavda saylavcılarnıñ 57 fayızı yani 32.699 adam iştirak etti, – dep qayd etti Merkeziy saylav komissiyasınıñ reisi Z. Smedlâyev. O, bunıñ kibi de er bir regionda saylavcılarnıñ faalligine Meclis azalarınıñ diqqatını celp etti. İşte. Bağçasaray regionında – 57%, Aqmeçette – 68%, Qurmanda – 60%, Qarasuvbazarda – 54%, Canköy şeerinde – 14%, Aqyarda – 54%, İçki regionında – 68% saylavcı saylavğa keldi.

“Bir çoq cemaat teşkilâtları közeticiler sayısını arttırdılar ve demek saylavlar daa ziyade demokratik şekilde keçecek, – dep qoşumca etti Merkeziy saylav komissiyasınıñ reisi Z. Smedlâyev ve mayıs 4 –te saylavlar Aqşeyh ve Curçı, mayıs 5-te Aluşta, Kefe ve Saq regionlarında keçecegini bildirdi.