Aqmescitte Qırımtatar halqı 5-nci çağırılış Qurultayınıñ beşinci sessiyası öz işini başladı

12 January 2013

2013 senesi yanvar 12 künü Aqmescitte Qırımtatar halqı 5-nci çağırılış Qurultayınıñ beşinci sessiyası öz işini başladı. Qurultaynı açqan Qırımtatar halqı Meclisiniñ reisi Mustafa Cemilev salonda 195 Qurultay delegatı bulunğanını bildirdi.

Qurultaynıñ sessiyasında milliy areket iştirakçileri, Amerika, Türkiye ve Poloniyadan musafirler, cümleden uququqoruyıcı, küreşken Göñüldeşlik areketi Şarq bölüginiñ ortaq reisi, Qırım Forumınıñ azası Pötr Hleboviç, İstanbul yardımlaşma ve medeniyet derneginiñ reisi Celâl İçten, Türkiyedeki qırımtatar diasporasınıñ vekilleri, saylavlarnı devamlı nezaret etken “Açıq demokratiya komiteti” (“Committee for Open Democracy”)niñ vekilleri Maykl Getto ve Kennet Briker iştirak ettiler.

Sessiya “Ant etkenmen” milliy gimn ive Ukraina devlet gimninden başlandı. Qırımtatar halqı Meclisiniñ reisi Mustafa Cemilev Qurultay delegatlarını ve musafirlerni selâmladı. Qırım musulmanlarınıñ müftisi acı Emirali Ablayev Qurultay delegatlarına hayırlı iş tilep, dua oqudı.

Qurultay delegatları işçi organı saylavğa keçtiler. Prezidiumğa Mustafa Cemilevden ğayrı reis muavinleri Refat Çubarov, Remzi İlyasov, Ahtem Çiygoz, Teftiş komissiya reisi Qurtseit Abdullayev ve Müftiy Acı Emirali Ablayev saylandılar. Milliy qurultay delegatları sessiya kâtibiyetiniñ Zair Smedlâyev, Elvedin Çubarov, Dilâra Seytveliyeva ve Beyye İlyasovadan ibaret erkânını tasdiqladılar.

Sessiyanıñ qararı boyunca muarririyet komissiyasına Bekir Mamutov, Ali Hamzin, Sinaver Qadırov, Nariman Celâl, Refat Çubarov ve Şevket Qaybullayev kirsetildiler.

Qırımtatar halqı 5-nci çağırılış Qurultayınıñ beşinci sessiyasınıñ delegatları sessiyanıñ 1 meseleden ibaret kün tertibini tasdiqladılar. Esas olaraq Qurultaynı azırlav boyunca teşkiliy komitet azırlağan ve Meclis tarafından tasdiqlanğan “Qırımtatar halqı Qurultayınıñ delegatlarını saylav aqqında nizam” alındı.