Aqmescitte «Qırımoğlu…Bir halqnıñ küreşi» filmi taqdim etildi

26 Oktâbr 2013

Oktâbr 26 künü Qırımtatar halqı VI çağırılışı Qurultayı işiniñ birinci künü Qırımtatar akademik muzıkalı drama teatrinde çoqtan beklenilgen “Qırımoğlu…Bir halqnıñ küreşi” filmi taqdim etildi.

Qurultaynıñ birinci oturımına kelgen filmniñ yaratıcıları Türkiyeniñ “TRT” devlet televizion kanalında vesiqalı filmlerinen belli rejissörlar Neşe Sarısoy Karatay ve Zafer Karatay qurultay delegatları ve milliy areket veteranları ögünde çıqışta bulundılar.

Zafer Karatay şunı hatırlattı ki, filmniñ taqdimi bir yıl evelsi planlaştırılıp, bir sıra sebeplerden ötrü kösterilmedi. Resmiy tanıtım ise 2013 senesi mart 18-de Türkiyeniñ paytahtı Anqarada Türkiyeniñ Odalar ve Borsalar Birliginiñ salonında olıp keçti. “Bugün biz niayet işimizniñ neticelerini siziñ diqqatıñızğa avale etkenimizden memnünmiz”, – dedi Z. Karatay.

Filmniñ prodüser ive stsenariy müellifi Zafer Karatay iyaye etti ki, qırımtatarlar aqqında işbu film Türkiyeniñ devlet televizion kanalı tarafından çıqarılıp, 270 daqqa devam ete.

“Film 9 qısımdan ibaret olıp, er bir parçası 30 daqqa kete. Mezkür vesiqalı filmni azırlamaq, çekimler, arhivlerde çalışuv ve soñuna yetkizmek içün eki buçuq yıl kerek oldı. Filmniñ çekimleri Qırım, Ukraina, AQŞ, Türkiye, Belçika, Rusiye ve Özbekistanda yapıldı”, dep qayd etti Z.Karatay. Millet lideri ve belli siyasetçi Mustafa Abducemil Qırımoglunıñ taqdiri misalinde seyirci qırımtatar halqınıñ 1944 senesi sürgünliginden soñki taqdiri, Vatanğa qaytmaq oğrundaki küreşinen tanış ola.

“Qırımoğlu…Bir halqnıñ küreşi” filmi – qırımtatar halqınıñ faciasını, Vatan içün küreşi, Ukrainada şimdiki vaziyetini açıqlağan filmler türküminiñ başlanğıçıdır. Bu film Türkiyeniñ “TRT” devlet televizion kanalında vesiqalı filmlerinen belli rejissörlar Neşe Sarısoy Karatay ve Zafer Karatay ğayesiniñ birincisidir. Zafer Karatay film endi Türkiye devlet telekanalında numayış etilgenini de qayd etti. Qurultay iştiraçkilerine filmniñ 1944 senesi mayıs 18 faciası ve onıñ aqibetlerini tarif etken birinci eki qısmı kösterildi.

Şunı qayd etmeli ki, çekimler vaqtında dünyaca meşur dissidentler Vladimir Bukovskiy, Sergey Kovalev, Lüdmila Alekseyeva, Yevgeniy Sverstük, Aleksandr Podrabinek, Miroslav Marinoviç, Yuriy Orlov, Pavel Litvinov, Andrey Grigorenko, Semen Gluzman ve bunıñ kibi de qırımtatar milliy areketi iştirakçilerinen intervyülar yazıldı. Bunıñ kibi de qırımtatarlarnıñ taqdiri ve bugünki vaziyeti aqqında öz fikirlerini Ukraina Prezidenti Viktor Yanukoviç, Ukrainanıñ sabıq prezidenti (1991-1994 ss) Leonid Kravçuk, Türkiye Cumhurbaşqanı (1993-2000 ss) Suleyman Demirel, Türkiyeniñ Baş naziri Recep Tayip Erdogan, Türkiye Tış işleri naziri Ahmet Davutoglu ve bir çoqları bildireler.

Filmniñ eki qısmı kösterilip bitken soñ onıñ müelliflerine hıtap etken Amerika diasporasınıñ vekili Rustem Borluca qırımtatar halqı ve onıñ lideri Mustafa Cemilev aqqında böyle mündericeli ve tesirli film yapqanı içün Neşe ve Zafer Karatayğa teşekkür bildirip, öz ailesi adından bahşış ediye etti.