Aqmescitte Pavlo-Robert Magoçiyniñ kitabı taqdim etildi

08 Mayıs 2012

2012 senesi mayıs 8 künü İ. Gasprinskiy adına qırımtatar kütüphanesinde Toronto universiteti tarih ve siyasetşınaslıq fakultetiniñ professorı Pavlo-Magoçiyniñ “Ukraina: topraqları ve halqlarınıñ tarihı” kitabınıñ taqdimnamesi olıp keçti. Tedbirni alıp barğan kitapnıñ naşiri Valeriy Padâknıñ bildirgenine köre bu kitap ingliz tilinde basılğan “Ahistory of Ukraine: The Land and Its Peoples” kitapnıñ Ukraina halqları içün mahsus tercime etilgen ukrain variantıdır.

Bunıñ kibi de o şunı qayd etti ki, şimdi kitap bütün Ukraina boylap tanıtılmaqta. Kitapnıñ müellifleri, tercimanları ve naşirleri Aqmescitten ğayrı Herson, Nikolayev, Odessa, Lvov, Kiyev ve diger şeerlerni kezip, eñ soñ, kitap dünya yüzüni körgen Ujgorod şeerinde bulunacaqlar.

“Kitapta tedqiq etilgenlerni, bahusus Ukrainağa doğru qıymet kesmek kerek, – dep başladı öz çıqışını Meclis reisiniñ birinci muavini Refat Çubarov. – Teessüf ki, men kitapnı oqup yetiştirmedim, tek saifeledim. Amma kitap qoyulğan maqsadğa yetkenini añlamaq içün bunıñ özü bile yeterli oldı. Yapılğan büyük ve müim iş içün müellifke minnetdarlıq bildirmek isteyim, tedqiqatlar keçirmek içün kitapnıñ emiyeti ğayet büyüktir” Refat Çubarov böyle kitapnıñ çıqması şahsen kendisi içün seneniñ müim vaqialarından biri olğanı ve kitapta qırımtatarlarnıñ tarihında da toqtalğanı sevindirici bir şey olğanını qayd etti.

“Başında bu kitap faqat ingliz tilinde qonuşqan insanlar içün yazılıp,bir zamanda ukrain tiline tercime etilecegini aslı da tüşünmegen edim, – dedi kitapnıñ müellifi Pavlo-Rober Magoçiya. – Esas maqsad amerikalı, kanadalılarnı Ukrainada yaşağan halq ve milletlerniñ tarihı, medeniyeti ve urf-adetlerinen tanış etmek edi. Kitapta evel gizli, belli olmağan malümat pek çoq. Bu, kitapnıñ qıymetini daa ziyade arttıra”. Körüşüvniñ soñunda er bir insan müellifke istegen sualini berip, tolu cevap ala bildi.

Taqdimnameden soñ müellif kitaplarını imzaladı, bir qısmını Qırım kütüphanelerine, şu cümleden İ. Gasprinskiy adına, İ. Franko adına kütüphanelerge ve birer nusha Qırım Medeniyet nazirligine “Maarifçi” qırımtatar tasil hadimleriniñ birligine berdi.

Aynı şu künü Qırımtatar halqı Meclisiniñ reisi Mustafa Cemilev Meclis ofisinde Toronto universiteti tarih ve siyasetşınaslıq fakultetiniñ professorı Pavlo-Robert Magoçiyni qabul etti.

Körüşüvde Meclis tışqı alâqalar bölüginiñ başı Ali Hamzin ve naşir Valeriy Padâk iştirak ettiler.

Cenap Magoçiy Meclis reisine özüniñ “Ukraina: topraqlarınıñ ve halqlarınıñ tarihı” kitabını berdi ve qırımtatar kütüphanesine olıp keçken taqdimname aqqında ikâye etti.

Professor Magoçiy bunıñ kibi de Qırım ve qırımtatar halqına bağışlanğan kitap endi bitirilmekte olğanını haber etti. Kitapnıñ iş serlevası “Muqaddes topraq” (“PleasantLand”) olacaq, – devam etti Magoçiy. Biz mezkür kitapnı ukrain, ingliz ve türk tilinde neşir etmekni tüşünemiz”. Bundan da ğayrı, professornıñ aytqanına köre 2013 senesi sentâbr ayında Aqmescit, Bağçasaray ve Kezlev şeerlerinde kitapnıñ resmiy taqdimi keçirilecek.

Robert Magoçiy bu kitap em ingliz tili, em türk tili ve şübesiz Ukrainada büyük meraq doğuracağına ümüt bildirdi.

Meclis reisi Mustafa Cemilev Toronto universiteti tarih ve siyasetşınaslıq fakultetiniñ professorı Pavlo-Robert Magoçiyge qırımtatar halqınıñ tarihına, taqdiri ve bugünki vaziyetine diqqat ayırğanı içün teşekkür bildirdi.