Aqmescitte Oraza bayram şerefine Küreş boyunca cumhuriyet yarışları keçirildi

10 Avgust 2013

2013 senesi avgust 10-da Ramazan bayramınıñ soñki künü Aqmescitte Oraza bayram şerefine qırımtatarlarnıñ milliy küreşi boyunca cumhuriyet yarışları keçirildi. Turnirni “Alraid” birleşmesi ve Küreş Cumhuriyet federatsiyası teşkilâtlandırdı.

Küreşçilerni Milliy Meclis reisiniñ birinci muavini, Bütündünya qırımtatarlar kongressiniñ prezidenti Refat Çubarov, Küreş boyunca Olimpiya oyunları çempionı Rustem Kazakov, Küreş federatsiyasınıñ kâtibi Enver Üseinov, “Emel” cemaat teşkilâtınıñ reisi Müslim Dervişev selâmlap, yarışta yeñişler tilediler.

Epsi olıp yarışta çeşit çeki kategoriyalarında Qırımnıñ bir sıra regionlarından em qırımtatar, em diger millet mensüpleri olğan 70-ke yaqın küreşçi iştirak etti.
“Biz küreş boyunca yarışlarnı er yıl ya Oraza, ya Qurban bayramı künleri keçiremiz. Bu sefer yarışnı Oraza bayramına bağışladıq, – dey Müslim Dervişev. – “Alraid” birleşmesi Küreş federatsiyasınen sıqı işbirlikte bulunıp, yarışlarnı yüksek professional seviyede keçmesini temin eteler”.

Onıñ bildirgenine köre ğalipler em medaller, fahriy yarlıqlar ve em de paranen taqdirlenecekler.

3 saat devam etken tutuşuvlar neticesinde ğalipler belgilendi. Olarnı yeñişlerinen ve Oraza bayramınen hayırlağan Milliy Meclis reisiniñ birinci muavini, Bütündünya qırımtatarlar kongressiniñ prezidenti Refat Çubarov “Alraid” birleşmesi ve Küreş federatsiyasına bu kibi yarışnı ananege çevirgenleri içün teşekkür bildirdi. Bunıñ kibi de Refat Çubarov ğaliplerge medallerni taqdim etti.

R. Çubarovnıñ aytqanına köre küreş boyunca turnirler yaşlarnı vatanperverlik ruhunda terbiyelevde, aqıllı, küçlü ve istidatlı gençlerni yetiştirüvde büyük siltemdir.

Teşkilâtçılarğa ayrıca hıtap etken Refat Çubarov böyle bir tedbirde milliy bayrağımız olmağanını qayd etti. ” Qırımda keçirdigimiz er bir tedbirimizde milliy bayrağımız mıtlaqa olmalı, – dep tenbiledi Çubarov. Öz nevbetinde teşkilâtçılar kelecek sefer böyle yañlışqa yol bermeyceklerini vade ettiler.

Ananege köre eñ ağır çekideki küreşçiler arasında ğalip çıqqan 60 kilolı qoynen mukâfatlandı. Yarıştan soñra er kes bayram sofrasına davet olundı.

Ösmürler arasında yarış neticeleri

35 kg.: 2 –nci yerde Ahmet Kulametov, 1 – Mustafa Ümerov.

50 kg. :3-nci yerde – Mustafa Hayberdiyev, 2 –nci yerde – Mustafa İbraimov, 1 – Emirali Osmanov.

55 kg: 3 – Rustem Miroşnikov, 2 – Alim Delna, 1 – Ruslan Miroşnikov.

60kg: 3 – Asan Şaipov, 2 – Yakub Bekirov, 1 – Ahtem Seytmemetov

70 kg: 3 – İsmet Alimcanov, 2 – Memet Asanov, 1 – Abdulla Kürbekov

75kg: 2- Cafer Sadıkov, 1- Sabri Tohtarov

85 kg: 3 – İvan Donenko, 2 – Marlen Azamatov, 1 – Marlen Seytumerov.


Üyken küreşçiler arasında ğalipler:

62 kg: 2 – Ervin Seytcelil, 1- Şevket Haybullayev.

68 kg: 3 – İlyas Kenjaliyev, 2 – Halil Hayberdıyev, 1 -Ruslan Holodov.

75 kg: 3 –Lenur Yuldaşev, 2 – Geray Qulametov, 1 – İzzet Qadırov.

80 kg: 3 – Marlen Qurtbedinov, 2 – İsmail İsmailov, 1 – Eldar Mametov.

100 kg: 2– Rudem Şabadinov, 1 – Aleksey Avdeyev


Eñ ağır çeki kategoriyasında ğalipler:

3 – nci yerde Asan Asanov,

2 – nci yerde Aleksey Avdeyev,

1 – nci yerde İlimdar Saidov.