Aqmescitte Meclisniñ kenişletilgen toplaşuvı ötkerildi

08 Avgust 2011

2011 senesi avgust 7-de Aqmescitte Qırımtatar halqı Meclisiniñ regional meclisler ve Qırımtatar halqı qurultayı teftiş komissiyası azalarınıñ iştirakinde kenişletilgen toplaşuvı olıp keçti.

Kün tertibindeki birinci mesele – yerli meclislerni saylavnıñ yekünleyici basqıçı muzakere etilgende yerli meclislerge saylavlarnı azırlav ve teşkilâtlandıruv komissiyasınıñ başı Refat Çubarov ta 2009 senesi başlanğan uzun müddetli saylavlar soñuna keleyatqanını qayd etip, Aqmescit, Aqyar, Aqmeçet ve Yalta regionlarda 2011 senesi oktâbr ayında ötkerilecek saylavlar aqqında ayttı.

Mezkür mesele baqılğanda çıqışta bulunğan Meclis reisi Mustafa Cemilev Aluşta regional meclisine işançsızlıq bildirmek ve Küçük Üzen köy meclisine ğayrıdan saylav keçirüv teklifini kirsetti. Delil olaraq reis Aluşta regional meclisi ve Küçük Üzen yerli meclisi Qırım Yuqarı Şurasına ve yerli şuralarğa 2010 senesi oktâbr 31-de olğan saylavlar boyunca Qırımtatar halqı Meclisi ve Qurlutayınıñ qararlarına boysunmağanlarını açıqtan-açıq köstergenlerini söyledi.

İşbu teklifke qoltutıp çıqışta bulunğan Meclis azaları Aluşta regional meclisi ve Küçük Üzeñ yerli meclisi Qırımtatar halqı qurultayınıñ qararlarını kerçekten de eda etmegenlerini tasdiqladılar.

Aluşta regionında meydanğa kelgen vaziyet uzun vaqıt muzakere etilmesi neticesinde Mustafa Cemilev Aluşta regional meclisine işançsızlıq bildirmek ve Küçük Üzen köy meclisine ğayrıdan saylav keçirmek teklifini reyge qoydı. Toplaşuvda bulunğan 25 Meclis azasından 23 neferi Meclis reisiniñ teklifine qoltutıp, qalğan 2 azası bitaraf oldılar.

Kuñ tertibiniñ ekinci meselesi boyunca Meclis azaları “Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve natsizm qurbanlarınıñ künü tedbirleri aqqında” qararnı qabul etiler. Meclis Kâtibiyetiniñ başı Zair Smedlâyev bildirgenine köre Qırımtatar halqınıñ Meclisi 2009 senesinden itibaren er yıl Aqmescitte çeşit içtimaiy ve siyasiy teşkilâtlarnıñ vekilleri iştirakinde şu künü informatsion mitingler keçirmekte. “Bu sene avgust 23-te saat 11-de Salğır bağçası yanındaki abide qarşısında Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve natsizm qurbanlarınıñ künü tedbirleri çerçivesinde qırımtatar halqınıñ sürgünlikte qurban olğanları hatırasına miting ötkerilecek”, dedi Z. Smedlâyev.

Bunıñ kibi de toplaşuvda Meclisniñ Topraq komissiyasınıñ başı Zevcet Qurtümerovnıñ qırımtatarlar öz başına işğal etken massivlerdeki uçastkalarnı qanunlaştıruvnen bağlı meselelerniñ ketişatı aqqındaki esabatı diñlendi. Topraq meselesiniñ çezilmesine ameliy bir areketler körülmegeni sebebinden Aqmescit yerli meclislerini Aqmescit şeeri inkişafınıñ baş planınen tanış etmek ve olarnıñ diqqatını “narazılıq tarlaları” bulunğan maallelerni abadanlaştırılmasına kirsetilecek deñişmelerge celp etmek vazifesi berildi. Topraq uçastkalarını ayıruv meselesi sozulğanı munasebetinen bazı yerli meclis azalarınıñ narazılıq aktsiyaları keçirmek teklifi diqqatqa alındı, amma kesen-kes qarar mesele tafsilâtlı ögrenilgenge qadar qaldırıldı.

Meclis toplaşuvına davet etilgen Cumhuriyet milletler komitetiniñ reisi Edem Dudakov “Sürgün etilgenlerni yerleştirüv ve içtimaiy-medeniy inkişaf ettirüv programması”nen tanış etip, Ukraina devlet bücetinden programma boyunca ayırılacaq sermiyalar öyle de kelip çıqmağanını qayd etti.

Bunıñ kibi de Meclis azaları Kiyev şeeri Peçerskpiy rayon makhkemesiniñ avgust 5 künü çıqarğan qararı boyunca Ukrainanıñ sabıq baş naziri, “Batkivşçina” siyasiy partiyasınıñ lideri Yuliya Timoşenkonıñ tevqif etilmesi neticesinde meydanğa kelgen vaziyetni muzakere ettiler. Çoqluqnıñ rey berüvinen Meclis azaları “Ukrainanıñ sabıq baş naziri, “Batkivşçina” siyasiy partiyasınıñ lideri Yuliya Timoşenkonıñ tevqif etilmesi munasebetinen Meclis beyanatı”nıñ leyhasını esas olaraq qabul etildi. Onda Meclis Ukrainada siyasiy sebepke köre taqip etilüvniñ ögüni almağa çağıra.

Toplaşuvnıñ soñunda Meclis azaları Pervomay regional meclisiniñ azası Enver Emirasanovnıñ Qırımtatar halqı Meclisiniñ kubogı içün futbol boyunca yarış keçirmekni teklifine qoltuttılar. Mezkür tedbirni reglamentini işlev ve azırlav boyunca işçi komissiyanı tizmek Meclis reisiniñ muavini Remzi İlyasovğa avale etildi.