Aqmescitte Meclis yolbaşçılarınıñ regional meclisler reislerinen birlikte toplaşuvı keçirildi

22 Noyabr 2013

Körüşüv Meclisniñ milliy idare organları, QMC devlet icra akimiyeti, yerli idare organları ve bütün seviyelerdeki şuralarnıñ deputatları ile iş boyunca idare tarafından teşkilâtlandırıldı.

Toplaşuv devamında Meclis idareleri ve regional meclislerniñ işbirligi, yerli milliy idare organlarınen bağlanuv meseleleri baqıldı. İdareniñ başı Zaur Smirnov regional meclislerniñ reislerine olarnıñ işini sistemleştirüvni teklif etti. O, körüşüv iştirakçilerine idareniñ elektron adresi açılğanını haber etip, er ay iş planını yollamaq, soñra ise er ayda esap bermek kerekligini ayttı. Bunıñnen birge o, cemi regional meclisler öz elektron adreslerini bildirmelerini tevsiye etti.

Qırımtatar tilinde tasil, qırımtatar tilini Qırımnıñ devlet ve cemaat ömüriniñ bütün saalarına tadbiq etüv idaresiniñ başı Emine Avamileva öz idaresiniñ işi aqqında malümat berdi. O, şunı qayd etti ki, Meclisniñ er bir idaresi öz iş planını azırlaycaq, regional meclislerniñ ait saa içün mesülietli olğan vekilleri şu planğa köre iş alıp baracaqlar. Emine Avamileva balalarınıñ ana tilinde oqumasını istegen ana-babalar mektepke yazacaq arizanıñ nümünesini kösterip, regional meclisler ana-babalarnen iş alıp barmaqnı başlamalarını rica etti. Bu işniñ neticesi ise milliy sınıflarnıñ açıluvı olacaq.

Milliy matbuat vastalarnıñ inkişafı boyunca idareniñ başı Gayana Yüksel öz idaresi aqqında aytırken, qırımtatar mediasınıñ canlanması oğrunda er şey yapılacağını işandırdı. O, milliy matbuat vastalarına olduqça çoqça insanlarımıznı abune ettirmek teklifinde bulundı.

Meclis azaları ise bu işte ibret olıp, birinciler sırasında abune olmaq kerekler. Bunıñ kibi de o, regional meclislerniñ reislerini yerlerdeki vaqialar aqqında acele haber etmege çağırdı ki, matbuat vastaları yerli milliy idare organlarınıñ işini tolu şekilde aydınlatsın.

Bunıñ kibi de toplaşuvda dekabr 10 künü İnsan aqları kününe bağışlanğan mitingge azırlıqnıñ ketişatı muzakere olundı.

Plan ve işlemelerniñ episi 2013 senesi noyabr 30-da olacaq Milliy Meclis toplaşuvında baqılacaq.