Aqmescitte Meclis azaları qırımtatar diaspora ve cemiyet reislerinen körüştiler

04 May 2013

2013 senesi mayıs 4 künü saat 10-da toplaşuva başlanmadan evel qırımtatar diaspora ve cemiyet yolbaşçıları Meclis reisi Mustafa Cemilev ve Meclis azalarınen birlikte ulu qırımtatar mütefekkiri, naşır, yazıcı ve “Terciman” adlı ilk türktilli gazetasınıñ esasçısı İsmail Gaspralı eykeline gülçemberler qoydılar.

Meclis reisi Mustafa Cemilev ve Meclis azaları keçirgen toplaşuvğa Türkiye, Almaniya, Poloniya, Rusiye, ve Kiyevden 70 adam keldi. Cümleden, Türkiyedeki qırımtatar diasporasını 38 dernek başqanları temsil ettiler, bunıñ kibi de Meclisniñ Almaniyadaki temsilcisi Ahmet Ozay, Poloniyadan – Selim Hasbiyeviç, Moskvadan – Mustafa Mühteremov, Kiyevden – Aslan Ömer Qırımlı.

Körüşüvde Qırım musulmanları müftisi aci Emirali Ablayev, qırımtatar milliy areket iştirakçisi Ayşe Seytmuratova, QMPU rektorı Fevzi Yaqubov, Meclis Teftiş komissiyasınıñ reisi Qurtseit Abdullayev, Meclis reisiniñ Türkiye meseleleri boyunca yardımcısı İsmet Yüksel, “Qırım” hayriye fondınıñ direktorı Riza Şevqiyev, “Bizim Qırım” halqara cemaat teşkilâtınıñ reisi Abduraman Egiz iştirak ettiler.

Qıymetli musafirlerni qarşılarken Meclis reisi Mustafa Cemilev diaspora vekilleri ve cemiyet azalarına qırımtatar halqı içün pek müim olğan bu körüşüvde faal qatılğanları içün teşekkür bildirdi. Meclis reisi toplaşuvda bir sıra müim meseleler muzakere etilip, qırımtatarlarnıñ bugünki alına dair fikirler paydaşılacaq, dedi.

“Bundan da ğayrı biz Qırımda Bütündünya qırımtatarlar kongressiniñ nevbetteki toplaşuvı ne zaman ve ne şekilde keçirilecegini de muzakere etermiz, – dedi Mustafa Cemilev. – Körüşüv neticelerine köre qırımtatar halqı aqlarını tiklev saasındaki problemlerni çezmek boyunca birleşip yapacaq areketlerimiz aqqında da qarar alınacaq”.

Meclis reisiniñ selâmlavından soñ körüşüv iştirakçileri Qırım musulmanlarınıñ müftisi acı Emirali Ablayevniñ imamlığında beraber dua oqudılar. Soñra qırımtatar milliy ve Ukrainanıñ devlet gimnleri yañğıradı.

Körüşüvden soñ elde etilgen neticeler boyunca kütleviy matbuat vastaları içün brifing keçirildi.