Aqmescitte küreş boyunca halqara yarış ötkerildi

28 October 2012

2012 senesi oktâbr 28-de Aqmescitte Qurban bayramı şerefine qırımtatar milliy küreşi boyunca IV Halqara turnir olıp keçti. Yarışta Ukraina, Türkiye, Rusiye, Özbekistan, Qazahstan ve Romaniyadan kelgen bir sıra dünya çempionatlarında ğalebe qazanğan küreşçiler iştirak ettiler.

Turnirde Londrada ötkerilgen Olimpiya oyunlarınıñ iştirakçisi Lenur Temirov da bar edi.

Yarışnıñ açılışında Meclis reisi Mustafa Cemilev, Meclis reisiniñ birinci muavini Refat Çubarov, Qırım Yuqarı Şurasınıñ deputatı Remzi İlyasov, Qırım küreş federatsiyasınıñ prezidenti Lenur İslâmov, Olimpiya çempionı, Qırım küreş federatsiyasınıñ fahriy prezidenti Rustem Kazakov, Türkiye Olimpiya komitetiniñ reisi İbraim Öztek çıqışta bulundılar.

Qırımtatar halqı meclisiniñ reisi Mustafa Cemilev hayırlav sözünde er kesni Qurban bayramınıñ soñki künü ile hayırlap, yarış teşkilâtçılarına teşekkürlerini bildirdi ve küreşçilerge ğalebeler tiledi. Bunıñ kibi de o, Qırımda böyle turnir ilk sefer keçirilgenini qayd etip, ileride böyle yarışlar anane olacağına ümüt bildirdi.

Açılış merasimi devamında kilim üstünde eñ kiçkene küreşçiler tutuştılar. Olarnıñ yarışına ise Rustem Kazakov akemlik yaptı. Turnir teşkilâtçıları er bir genç küreşçige altın medal ve birer qozu bağışladılar.

Yarışta küreşçiler altı çeki kategoriyasında – 60, 70, 80, 90, 100 ve 100-den ziyade kilogramm – küç sınaştılar. Er bir kategoriyada iştirak etkenler medal ve diplomlarnen, ğalipler ise angi çekide olğanına köre qoynen taqdirlendiler. Meselâ, 60 kilogramm çekideki ğalipke 100 kilolıq, eñ ağır çekiniñ ğalibine ise 250 kilolıq qoy berildi.

Tenefüs vaqtında çeşit devletlerniñ sportçıları öz milliy küreş çeşitlerini numayış ettiler.

Küreş boyunca Halqara yarışta aşağıdaki küreşçiler ğalip çıqtılar:

60 kilogramm çeki kategoriyasında : 3-nci yerde – Nariman Ataris, 2-nci yerde – Abdulhalil Hayberdıyev, 1-nci yerde – Ernest Velişayev

70 kilogramm çeki kategoriyasında : 3-nci yerde – İzzet Qadırov, 2-nci yerde – Ümer Bilâlov, 1-nci yerde –Lenur Temirov

80 kilogramm çeki kategoriyasında : 3-nci yerde – Osman Saliyev, 2-nci yerde – Ridvan Asanov, 1-nci yerde – Ennan Seferov

90 kilogramm çeki kategoriyasında : 3-nci yerde – Eldar Memedov, 2-nci yerde – Alim Ablâmitov, 1-nci yerde – Amit Ablâmitov

100 kilogramm çeki kategoriyasında : 3-nci yerde – İslâmov İslâm, 2-nci yerde – Aleksandr Alekseyev, 1-nci yerde – Elemdar Saidov.

Eñ ağır çeki kategoriyasında Arsen Yunusov üçünci, Timur Primşoyev – ekinci ve İgor Zadernovskiy birinci yerni elde ettiler.

Turnir sponsorlarından biri TurkishAirlines kampaniyasından mahsus bahşış İstanbulğa bilet 100 kilogramm çeki kategoriyasında yeñgen Elemdar Saidovğa taqdim etildi.

Yarıştan soñ turnir iştirakçileri ve musafirler bayram sofrasına davet etildiler.