Aqmescitte Halqara insan uquqları kününe bağışlanğan miting olıp keçti

10 Dekabr 2011

10 dekabr künü Aqmescitte Halqara insan uquqları kününe bağışlanğan miting olıp keçti.

Bütünqırım mitinginiñ teşkilâtçıları Qırımtatar halqınıñ Meclisi qırımtatar cemaat teşkilâtlarınen birlikte miting şiarı olaraq qırımtatar halqınıñ ulu evlâdı İsmail Gasprinskiyniñ “Tilde, fikirde, işte – birlik!” sözlerini sayladılar.

Halqara insan uquqları kününe bağışlanğan Bütünqırım mitinginde Qırımnıñ çeşit yerlerinden kelgen 5000-den ziyade insan iştirak etti
“Qırımtatar halqınıñ birdemligi ve maneviy birligini pekitmek, qırımtatar halqınıñ saylanma organları olğan Qırımtatar halqı Qurultayı, Milliy Meclisi, regional ve yerli meclislerni inkişaf ettirmek ve pekitmek içün biz bütün çare-tedbirlerni körermiz”, – denile Halqara insan uquqları kününe bağışlanğan Bütünqırım mitingi iştirakçileri tarafından dekabr 10 künü qabul etilgen qararda.

Mitingde çıqışta bulunğanlar daa bir kere qırımtatar halqınıñ öz-özüni belgilev uquqı aqqında aytıp, bu uquq teminlenmegenge qadar Ukrainada insan aqlarınıñ qorçalanması mümkün olmağanını qayd ettiler.

Foto: Zarema Yaliboylu, Meclisniñ matbuat hızmeti