Aqmescitte Cengiz Dağcınıñ hatıra aqşamı oldı

29 Sentâbr 2011

2011 senesi sentâbr 28 künü Akmescitt Qırımtatar akademik muzıkalı-drama teatrinde dünyaca belli qırımtatar romancı yazıcı Cengiza Dağcınıñ hatıra aqşamı keçirildi. Aqşam devamında seyircilernen tolu teatr salonında Cengiz Dağcı aqqında vesiqalı film numayış etildi. Qırım musulmanlarınıñ müftisi acı

Emirali Ablayev merhum yazıcınıñ ruhuna dua oqudı. “Cengiz Dağcı” vesiqalı filmniñ müellifi Qırımtatar halqı Meclisiniñ Türkiyedeki temsilcisi, belli türk jurnalisti Zafer Qaratay yazıcınen nasıl körüşkeni, çekimler ketişatı ve film qaramanınen şahsiy subetleri aqqında hatırlavlarınen paylaştı.

Cengiz Dağcı aqqında ikâye eter eken, Zafer Qaratay yazıcınıñ Vatanı ve öz halqına sıñırsız sevgisini ayrıca qayd etti. Bilhassa, Dağcı dünyağa keldigi köy Qızıltaşqa sadıqlığını tarif etmege tırıştı. “Cengiz ağanıñ icadınen balalığımda tanış oldım, – ikâye etti Qaratay. İlk kere qoluma Dağcınıñ kitabını alıp, bütün gece çıraq yarığında, o zamanda daa elektrik ışığı yoq edi, oqup çıqqandırım. Ve mına balalıqtaki arzum kerçekleşip, yazıcı ile şahsen tanış oldım”.

Filmden soñ çıqışta bulunğan Milliy Meclis reisi Mustafa Cemilev, Cengiz Dağcınıñ sınıfdaşı professor Yakub Bekirov, qırımtatar yazıcılar birliginiñ reisi Riza Fazıl ve Qırımtatar halqı Meclisi reisiniñ birinci muavini Refat Çubarov Cengiz Dağcı aqqında 70 yıl Vatandan tışta yaşap, onı bir saniye bile unutmağan, ana tilini unutmağan, onda öz eserlerini yaratqan bu acayip insan aqqında samimiy sözlerini ayttılar. Mustafa Cemilevniñ hatırlağanına köre, o Cengiz Dağcınıñ icadı aqqında 60-ncı senelerde Moskva kitaphanesinde milliy matbuatımıznıñ arhivinde çalışqan vaqtında eşitken. Lâkin yazıcınıñ “Yurtunı ğayıp etken adam” eserini alıp oqumaq içün mahsus ruhset kerek ola. Cemilev şunı da qayd etti ki, kitapnı alğan soñ da onı tek telükesizlik organları hadimleriniñ nezareti altında oqumaq mümkün olğan. “Kitaptan qaydlar yapmaqnıñ iç imkânı yoq edi”, – hatırladı Cemilev.

2005 senesi Meclis reisi ve İstanbul Qırımtatar yardımlaşma ve medeniyet derneginiñ başı Celâl İçten rametli gazetacı Kemal Çapraz ile beraber Cengiz Dağcınıñ Londradaki evinde musafirlikte oldılar. ” Cengiz ağanıñ samimiy qarşılavı ebediy hatıramda qalacaq”, – dedi M.Cemilev.

Yazıcınen körüşüvini hatırlağan Meclis reisiniñ birinci muavini Refat Çubarov Cengiz ağa candan sevdigi vatanğa öyle de qaytıp olamağanını qayd eter eken: “Cengiz Dağcınıñ Vatanğa qavuşmaq soñki istegini yerine ketirip, onı Qırımda qarşılaycaqmız ve ne yazıq ki, tuvğan Qızıltaşında yerge berip, ebediyen vedalaşacaqmız”, dedi.

Aqşamnıñ soñunda sanağa çıqqan Qırımtatar qadınlar birliginiñ reisi Safinar Cemileva filmniñ müellifi Zafer Qaratay ve onıñ komandasına teşekkürlerini bildirdi.

Meclis matbuat hızmeti
QHA