Aqmescitte cellât Stalin aqqında sergi munasebetinen Rusiyeniñ Sürgün etilgen halqlar birliginiñ beyanatı

27 December 2012

Rusiyeniñ Sürgün etilgen halqlar birligi 2012 senesi dekabr 21-de Aqmescitte cellât Stalinge bağışlanğan sergi şeerniñ tam merkezinde ve özü de şu cellâtnıñ emiri ile sürgün etilgen qırımtatar halqınıñ vatanında keçirilmesi munasebetinen narazılığını bildire. Belli ki, bu sergide Stalinniñ “arqadaşları” Adolf Gitler ve Yoahim fon Ribbentropnıñ resimleri de yerleştirilmesi mantıqlı edi.

Stalinciler bu adımlarını sabıq sovetler hududındaki akimlerniñ böyle areketlerge parmaq arasından baqqanları sebebinden yapabildiler. Qanlı cellâtnıñ faaliyetini köstermege tırışmaq HH asır qurbanlarınıñ hatırasını aqaret etmektir.

Qırımda Stalin siyaseti tarafdarlarınıñ bu pis areketini biz, Rusiyeniñ Sürgün etilgen halqlar birligine kirgen çeçen, qalmıq, inğuş, qaraçay, balqar halqlarnıñ vekilleri bizim halqlarğa, ukrain ve qırımtatar halqlarına nisbeten kösterilgen açıqtan-açıq sayığısızlıq, dep sayamız. Eminmiz ki, bizim pozitsiyamızğa mesheti türkler, Volgaboyu nemseleri ve stalin rejiminden zarar körgen diger halqlar da qoltutalar.

Böyle pis provokatsiya içün Aqmescit ve Qırım muhtariyeti akimleri cevapkârdırlar. Zanımızca Mustaqil devletler birligine kirgen bazı memleketler de bu vaqıtqa qadar totalitar rejimge sed çekmegeni, sürgün etilgen halqlar ögünde borclarını ödemegeni içün mesüliet taşımaqtalar.

Stalincilerge qoltutqan akimlerniñ areketlerine açuvlanğan qırımtatarlarnıñ duyğularını pek yahşı añlaymız. Qırımtatar qardaşlarımıznen göñüldeşmiz.

Halqları şu cellâtnıñ siyasetinden zarar körgen Sürgün etilgen halqlar birligine kirgenler memleketlerde böyle sergiler keçirilmesine qatiyen qarşımız.

Biz OSCE Parlament Assambleyasınıñ “Bölüngen Avropanıñ birleşmesiniñ 2009 senesi iyül 3-te qabul etken ve natsist ve kommunist rejimleriniñ insanlıqqa nisbeten yapqan zulumlarını cinaiy dep tanığan “Bölüngen Avropanıñ birleşmesi: OSCE regionında HH asırda insan aqları ve grajdanlıq serbestligini taqdirlev” qararını maqulleymiz.

Biz kommunist rejimi üzerinden Nürnberg-2 mahkemesini teşkil etmekni maqsadında olğan “Avropa hatıra ve vicdan platforması”nıñ maqsad ve vazifelerini taqdirleymiz.

Biz Ukraina Prezidenti Viktor Yanukoviçke Ukrainadaki neostalincilerniñ bu pis areketlerine qıymet kesmesini talap etip muracaatta bulunamız.

Halqara cemaatçılıqqa bizim bu muracaatımızğa qoltutmasını rica etemiz.

Arkadiy Gorâyev, “Rusiyeniñ Sürgün etilgen halqlar birligi” reis

Sabançiyev İsmail, “Balqar halqı qartlarınıñ keñeşi” cemaat teşkilâtı (Balqarlar)

Sultan Şavhalov, “Çeçenlerniñ cemaat şurası” Dağıstan regional cemaat teşkilâtı (Dağıstan çeçenleri)

Böris Urusov, “Camagat” Qaraçay regional demokratik teşkilât, reis muavini

İssa Ahilgov, “Mehk-Khel” İnğuş Cumhuriyeti regional cemaat areketi (Halq Şurası)

2012 senesi dekabr 27