Aqmescitte Büyük Cuma cami qurulacaq yerde patlavlar yüz berdi

01 December 2012

2012 senesi dekabr 1 künü tañda saat 5-te bellisiz şahıslar Aqmescitte Büyük Cuma cami qurulacaq yerde qaravulğa tecavuz etip, patlayıcı maddelernen tolu şişelerni attılar. Şişelerniñ biri qaravulnıñ vagonçığına urulıp, yanğın başlandı.

Qaravul ateşni söndürip, Qırım musulmanlarınıñ müftisine haber berdi. Adise yüz bergen yerge acı Emirali Ablayev ve Meclis reisiniñ birinci muavini Refat Çubarov acele yetip keldiler.

Qaravulnıñ aytqanına köre, patlavlar öyle küçlü olğan ki, vagonçıq divarında asılı saat uçıp tüşken.

Patlav aqqında militsiyağa haber etilgen soñ, Meclis reisiniñ birinci muavini Refat Çubarovnıñ bildirgenine köre patlav olğan yerge Ukraina İçki işler nazirliginiñ Qırımdaki taqiqatçıları da kelgenler.