Aqmescitte 1932-1933 senelerdeki açlıq qurbanlarınıñ hatırasına dua ve matem mitingi keçirildi

23 Noyabr 2013

Açlıq qurbanlarınıñ hatırasına bağışlanğan miting noyabr 23 künü aziz Vladimir ve Ölga kilsesi yanında saat 16.00-de umummilliy sukünet daqqasını ilân etken çañ sesinden başlandı.

Bundan evel Kiyev patriarhatı Qırım ukrain pravoslav kilsesiniñ başı Kliment Açlıq qurbanlarınıñ ruhuna dua oqudı.

Matem mitinginde Ukrain cemiyeti ile birlikte Milliy Meclis reisi Refat Çubarov, Qurultay delegatları, qırımtatar halqı milliy areket veteranları iştirak ettiler.

Öz çıqışında Meclis reisi Refat Çubarov Qırımtatar halqınıñ Meclisi ve şahsen kendisiniñ adından ukrain cemaatına taziye bildirip, dua merasiminiñ iştirakçilerini Ukrainada demokratiya, serbestlik, insan ve halqlarnıñ aqlarını qorçalavda faal olmağa çağırdı.