Aqmescitniñ Yañı Qırım maallesinde ( Balaklavskaya soqağında) Qurban Bayram

08 Noyabr 2011

Noyabr 8 künü Aqmescitniñ Yañı Qırım maallesinde ( Balaklavskaya soqağında) “narazılıq meydanı” iştirakçileri Aqmescit regional meclis ve Qırım musulmanlarınıñ müftiliginen beraber Qırımtatar halqı Meclisiniñ qoltutuvı ile musulmanlarnıñ eki büyük bayramından biri olğan Qurban bayramı munasebetinen tantanalı tedbir teşkil ettiler.

Yañı Qırım maallesi ve etraftaki mikrorayonlarda yaşağan sakinlerni Qurban bayramınen hayırlamaq içün Meclis reisi Mustafa Cemilev, Qırım musulmanları müftisi haci Emirali Ablayev, Meclis Kâtibiyetiniñ reberi Zair Smedlâyev, Meclis Topraq komissiyasınıñ reisi Zevcet Kurtumerov, Meclis Teftiş komissiyası reisiniñ vazifesini eda etici Qurtseit Abdullayev, Aqmescit regional meclis reisi Ruslan Enannov, milliy areket veteranları, bunıñ kibi de Türkiyeden kelgen musafirler bulundı.

Maallede qurulğan dülber cami yanında donatılğan bayram sofraları başına 100-den ziyade adam yerleşti. Bayram adetine köre qurban çalınıp, qurbanlıq etinden milliy qırımtatar yemekleri azırlandı.

Tedbir devamında musafirler yerli sakinlerni bayram ile hayırlap, eyi tileklerini bildirdiler.

Meclisniñ reisi Mustafa Cemilev, semetdeşlerni bayram ile hayırlar eken, tedbir iştirakçilerine ve umumen bütün qırımtatar halqına sağlıq ve bolluq tiledi.
Meclis reisi öz çıqışında soñki haberlerde, cümleden Anatoliy Mogilövnıñ Qırım ükümeti reberligine tayinlenmesinde toqtalıp, onıñ qırımtatar halqı ve vekâletli organı adına söylegen menfiy fikirlerini hatırlattı.

Stalinniñ bütün bir halqnı sürgün etkenini doğru tanığan, yarımadanıñ asıl halqını satqınlıqta qabaatlağan insanğa böyle yüksek bir vazifeniñ avale etilmesini M.Cemilev aqılsız qarar, dep saya. “Qırımtatar halqınıñ milliy areketi çoq yıllar devamında öz aq-uquqları içün demokratik usullarnen küreşip, iç bir türlü provokatsiyalarğa qapılmadı, halqnıñ şerefini köterdi, dedi Cemilev. Mogilöv kibi insannıñ aynı Qurban bayramı künlerinde tayinlenmesini Ukraina siyasetçileri farqlı qabul ettiler”Meclisniñ ve umumen bütün semetceşlerimizniñ vazifesi bazı siyasiy şahıslarnıñ ayın-oyunlarına emiyet bermeden, aqıl-ferasetnen iş körmektir”, – dedi Meclisniñ başı.

Meclisniñ Topraq komissiyası başı Zevcet Qurtümerov öz çıqışında semetdeşlerimizni cesür olmağa, tarihiy Vatanımız içün küreşni toqtatmadan, ecdatlar toprağına adaletni tiklemege çağırdı. Bunıñ kibi de o, bayram tedbiriniñ böyle teşkilâtlı keçmesinde “narazılıq meydanı”nıñ yetekçisi Rustem Halilov ve maalle sakinleriniñ hızmetlerini ayrıca qayd etti.

Musafirler içün bestekâr ve yırcı Zore Qadıyeva, Qırımda nam qazanğan artist Alim Osmanov ve qırımtatar. “Qara-Dağ” gruppası icrasında bayram kontserti berildi