Aqmescit ve Bağçasaray regional meclisleri Qırımda qanunsız göñülli bekçilerniñ qurumları yasaqlanmasını talap eteler

13 Fevral 2014

Qırımtatar halqı Meclisiniñ bütün regional meclislerine Saq regional meclisniñ Qırım muhtariyetinde ayırımcılıqqa çağırğan şahıslarnı cevapkârlıqqa çekmek ve Qırım göñülli bekçiler qurumlarını şekillendirüvni toqtatmaq aqqında 2014 senesi fevral 8 künü alğan qararına qoltutmaq tevsiyesine binaen Aqmescit regional meclisi fevral 13 künü kenişletilgen toplaşuv keçirdi.

Şunı qayd etmeli ki, fevral 12 künü Bağçasaray regional meclisi regionlarara toplaşuvlarnıñ neticelerine köre öz toplaşuvını ötkerip, onda Saq regional meclisiniñ Qırımda qanunsız göñülli drujinalarnı şekillendirmekni yasaqlav qararına qoltutqanı aqqında qarar aldı.

Aqmescit regional meclis toplaşuvında Meclis reisiniñ muavinleri Zaur Smirnov ve Nariman Celâl, bunıñ kibi de yerli meclislerniñ azaları, imamlar ve diniy cemiyet vekilleri, Qurultay delegatları, Aqmescit rayonı yerli şuralarnıñ deputatları iştirak ettiler .

Saq meclisiniñ pozitsiyasına qoltutaraq Aqmescit regional meclis azaları da Qırımda ayırımcılıq areketlerini qaraladılar ve Ukraina Telükesizlik hızmeti, Ukraina Baş prokuraturası, Ukraina İçki işler nazirliginden Qırımda ayırımcılıq areketlerini yapqanlarnı cevapkârlıqqa çekmelerini talap ettiler.

“Aqmescit regional meclis azaları Qırım akimleri ve Ukraina ve Qırım uquqqorçalayıcı idarelerinden Qırım Muhtariyeti ve Aqyar şeeri Yerli idare organları birleşmesiniñ Qırım göñülli bekçileri qurumlarını tizmek areketlerini toqtatmaq ve er angi cemaat teşkilâtları, siyasiy partiyalar tarafından Qırımda öz-özüni mudafaa etüv otrâdlarını şekillendirmekni yasaqlamağa talap ettiler”, – dep izaat berdi Aqmescit regional meclis reisi Lemmar Yunusov.

Toplaşuv devamında 2014 senesi fevral 23 künü Aqmescitniñ merkeziy meydanında qırımtatar halqınıñ büyük siyasiy ve cemaat erbabı, Qırım, Poloniya, Litva ve Beyaz Rusiye müftisi Noman Çelebicihan öldürilmesiniñ 96 yıllığı munasebetinen matem mitingine azırlıq ketişatı muzakere etildi.

Meclis reisiniñ muavinleri Nariman Celâl ve Zaur Smirnov Qırımnıñ eñ büyük regionlarından biri olğan Aqmescit regional meclis azalarını keçirilecek miting aqqında bütün semetdeşlerimizni haber etmek, mezkür tedbir davasız, tın olaraq, mitingniñ keçirilmesine keder etmek er angi areketi fesat dep tanılacağını qayd etmege çağırdılar.

“Qırımtatar halqınıñ ulu evlâdı, halqımız aqlarınıñ tiklenilmesine canını bergen Noman Çelebicihannıñ hatırasını yüksek seviyede añmaq bizim muqaddes borcumızdır, – dedi Z. Smirnov.