Aqmescit ve Aqmeçit regionlarında yerli meclislerge saylav müddeti belgilendi

07 Fevral 2012

Yerli meclis azalarını saylav aqqında ilân etmek qararı alındı

Yerli meclislerge saylavğa azırlıq ve teşkil etüv boyunca komissiyanıñ nevbetteki toplaşuvında Aqmescit ve Aqmeçit regionlarında saylavlarğa azırlıq körmek ve teşkil etmek meseleleri baqılıp, Aluşta regionında yerli meclislerge saylav boyunca maalliy territorial komissiyalarnıñ erkânı tasdiqlandı.

Qayd etilgen meselelerniñ muzakeresi devamında Aqmescit şeeri ve Aqmescit rayonındaki yerli meclislerge saylavlarnı 2012 senesi mart 31 künü, Aqmeçit rayonında – 2012 senesi aprel 7-de keçirmek qararlaştırıldı.

Aluşta regionında saylavlarnı keçirüv meselesini Yerli meclislerge saylavğa azırlıq ve teşkil etüv boyunca komissiyanıñ nevbetteki toplaşuvında muzakere etip, yerli territorial saylav komissiyalarınıñ erkânına qırımtatar cemaat ve siyasiy teşkilâtlarından namzetlerni tasdiqlamaq qararı alındı.

Aşağıda Qırımtatar halqınıñ Meclisi 2008 senesi iyül 5-te qabul etken “Qırımtatar halqınıñ özüni-özü idare etüv maalliy milliy organları aqqında nizam”nıñ bazı maddelerini ketiremiz. Onda yerli meclislerge saylavlarda iştirak etüv, yerli meclis azalığına namzetlerni kösterüv ve cedvelge aluv tertibi belgilengendir.

3.15. Yerli meclislerge saylanmaq uquqına qırımtatarlar ve aileleriniñ , milletinden qatiy nazar, 18 yaşını toldurğan ve yerli meclisni saylamaq içün terriitorial esasnı teşkil etken yerde yaşağan azaları maliktir.

Şahısnıñ yerli mecliske saylavda iştirak etüv aqqını Ukraina grajdanı pasportı ve ya da onıñ yerli meclis saylanayatqan ait yerde yaşağanını bildirgen diger resmiy vesiqa tasdiqlay.

3.16. Yerli mecis azalığına namzetlerni kösterüv ve cedvelge aluv tertibi.
Yerli meclisniñ azası saylavda iştirak etmege aqqı olğan ve yerli meclisni saylamaq içün terriitorial esasnı teşkil etken yerde yaşağan saylavcılar arasından saylana.

3.16.1. Yerli mecliske saylanmağa istegenler namzetlerini kendileri köstereler.

3.16.2. Yerli meclisniñ azalığına namzetligini köstermege istegen şahıs yerli territorial komissiyağa şekilini Yerli meclislerge saylavğa azırlıq ve teşkil etüv boyunca komissiya tasdiqlağan imza vereqasını bermesi aqqında arizanen muracaat ete.

Yerli territorial komissiya İmza vereqasını yerli meclisniñ azalığına namzetligini köstermege istegen şahısqa arizanı taqdim ettigi künü berile.

Er bir saylavcı yerli meclis azalığına namzetligini köstergen bir ya da bir qaç namzet içün imza qoya bilir.

İmza vereqası berilgen künden itibaren namzetke yerli meclisniñ azası olmağa istegen şahısqa namzet olaraq cedvelge alınması içün ait vesiqalarnı taqdim etüv müddeti belgilene.