Aqmescit şeer şurası Sürgünlik qurbanlarınıñ hatıra künü tedbirlerine azırlıqnı başladı

10 April 2012

Aqmescit şeer şurasınıñ meclisler salonında Qırımdan sürgün etilüv qurbanlarınıñ hatıra künü tedbirlerine azırlanuv ve keçirüv boyunca teşkiliy komitetniñ toplaşuvı olıp keçti.

Toplaşuvnı şeer yolbaşçısınıñ icra organları faaliyetiniñ meseleleri boyunca muavini İgor Skutskiy alıp bardı.

Teşkiliy komitet işinde Qırımtatar halqı Meclisiniñ azaları Zair Smedlâyev ve Zevcet Qurtümerov iştirak ettiler.

Toplaşuvda 2012 senesi mayıs 17-18 künleri matem tedbirlerini azırlav ve keçirüv boyunca meseleler baqıldı.

İgor Skutskiy teşkilyi komitet azalarından matem tedbirlerine azırlıq işleriniñ ketişatı aqqında tafsilâtlı esabat bermekni rica etti. Uquqqoruv organlarınıñ vekillerine yollanılğan müim meselelerden biri matem mitingini keçirüv ve yürüş devamında tertip-nizamnı teminlemektir. Devlet avtoinspektsiyası hadimlerine ise tedbirler keçirilgen vaqtında iştirakçiler ve şeer sakinleriniñ telükesiz areketini teminlemek avale olundı.

Nevbetteki toplaşuvda Qırımdan sürgünlik qurbanlarınıñ Qırım nazirler Şurasınıñ qararına binaen hatıra künü tedbirlerine azırlıq meselesi daa bir kere baqılacaq.