Menu 
Aqmescit regionında yerli meclislerniñ azaları saylandı
02 Aprel 2012
Cumaertesi künü, 2012 senesi mart 31-de Aqmescit şeeri ve Aqmescit rayonı yerli meclisleriniñ azaları saylandı.
Şu künü Aqmescit regionındaki 34 yerli mecliske azalar saylanacaq 70 saylav uçastkalarnıñ qapıları saylavcılar içün saba saat 8-de açıldı. 12 yerli meclis Aqmescit şeeri ve 22-si Aqmescit rayon erkânına kire.
Belli ki, “Qırımtatar halqı öz-özüni idare etüv milliy organlar boyunca nizamname”ge köre yerli meclislerniñ azaları umumiy, musaviy ve doğrudan-doğru saylav uquqı esasında gizli rey berüv yolunen saylanalar. Aqmescit regionı yerli meclislerine azalar saylavlarnıñ keçirilmesinden evel Yerli meclislerge saylavlarnı azırlav ve teşkilâtlandıruv boyunca komissiya tarafından er taraflı iş alıp barıldı. Yerli territorial ve uçastka saylav komissiyalarında göñülli olaraq 500-den ziyade insan çalıştı.
Saylavlarnı keçirüv, bunıñ kibi de saylavlarğa azırlıqnıñ er bir basqıçınıñ tertibi, şu cümleden namzetlerni kösterüv ve cedvelge aluv aqqında Aqmescit regionınıñ saylavcılarına Kütleviy informatsiya vastaları ve öz-özüni idare etüv milliy organınıñ yerli teşkilâtları rey berilmesinden 45 kün evel haber etildi. Belgilengen müddette yerli mecliske 322 azanıñ saylanılması içün 491 namzet cedvelge alındı.
Rey berüvniñ 2012 senesi aprel 2 saba yekün çekilgen neticelerine köre saylav epsi yerlerde oldı. Köylerdeki saylavcılarnıñ faalligi 42 fayız, bazı yerlede 74 fayız olsa, bazılarında 27 fayıznı da teşkil etken. Şeer saylavcılarınıñ aktivligi 30 fayıznı teşkil etip, mında da 78 fayızdan ta 15 fayızğa qadar aktivlik közetildi.
Al-azırda Yerli meclislerge saylavlarnı azırlav ve teşkilâtlandıruv boyunca komissiya territorial ve saylav uçastkalarnıñ protokollarını, bunıñ kibi de bülletenlerni qabul ete. Yerli saylav komissiya azalarınıñ yüksek professionalligi sayesinde saylavlar “Qırımtatar halqı öz-özüni idare etüv milliy organlar boyunca nizamname”ge muvafıq keçirildi. Saylavlarnı azırlav ve keçirüv boyunca komissiyağa ancaq bir qaç şikâyet tüşti.
Aynı zamanda Yerli meclislerge saylavlarnı azırlav ve teşkilâtlandıruv boyunca komissiyanıñ azaları Mazanka yerli meclisine azalarnı saylavda bazı hatalarğa yol berilgenini qayd ettiler. Bu mesele komissiyanıñ toplaşuvında da baqılacaq.
Aqmescit regionında yerli meclislerge azalarnı saylavlarnıñ soñ neticelerine Yerli meclislerge saylavlarnı azırlav ve teşkilâtlandıruv komissiyasınıñ eñ yaqın vaqıtta olacaq toplaşuvında yekün çekiledzjek.
