Aqmescit rayonı Mamut Sultan vadiysinde qırımtatarlarnıñ Hıdırlez bayramı qayd etildi

07 Mayıs 2012

2012 senesi mayıs 6 künü Mamut-Sultan köy şurasına baqqan Mamut Sultan (Dobroye), Tahta-cami (Andrusovo), Eski-saray (Pionerskoye), Şumhay (Zareçnoye), Angara (Perevalnoye), Tavel (Krasnolesye) köyleri birleşip Hıdırlez bayramını qayd ettiler.

Bayram stadionda keçirilip, sabadan qurulğan sanada bediiy aveskârlıq kollektivleri, milliy mektep talebeleri ve balalar bağçasında terbiyelengen oğlan-qızçıqlar öz çıqışlarınen adamlarnı ğayet hoşnut ettiler. Cemaat içün şu yaqınlarda pilâv ve çiberekler azırlanıp, er kesni qoqulı qave ve tatlılarnen sıyladılar. Yigitler milliy küreş yarışlarında öz küçüni sınadılar. Oyun meydanlarında balalar eglendiler. Yaş ana-babalar oyuncaq ayvanlar yanında resim çektiler. Aynı vaqıtta ameliy sanat ve esnafçı ustaları işleme, savut-saba, milliy qoqlalar ve ilvanlarnı teklif ettiler.

Vadiyniñ qartları bayramnı adetlerimizge köre duanen açtılar. Çoqbalalı ana, on dört torun bitası Fatma Yazıciyeva bayırdan QALAQAY tığırtuv şerefine nail oldı. Qalaqay ters tarafınen tüşkenine baqmadan, adamlar elçırpmalarnen yağmurlı yazdan soñ bereketli küz kelecegini yorumladılar.

Mamut Sultan ealisini bayram ile hayırlamaq içün Qırımtatar halqı Meclisiniñ reisi Mustafa Cemilev, Bütündünya qırımtatarlar kongressiniñ prezidenti Refat Çubarov, Mamut-Sultan qasaba başı İgor Budanov, Meclis maarif ve medeniyet idaresiniñ başı, Qırım Yuqarı Şurasınıñ deputatı Safure Kacametova, Meclis Prezidiumınıñ azası Zevcet Qurtümerov, Meclis azası Fevzi Qubedinov, “FOND “KRIM” hayriye teşkilâtınıñ reisi Riza Şevqiyev, qırımtatar cemaat teşkilâtlarınıñ azaları, Qırımda hızmet köstergen artist Zarema hanım ve onıñ qızı, “Golos Kraїni” ukrain şousınıñ iştirakçisi Sevil Memetova ve digerleri keldiler.

İslâm dinini kütken qırımtatar halqı içün HIDIRLEZ bayramı, çeşit fikirlerge baqmadan zıt bir şey degil, aksine halqnıñ qadimiy adetleri ve zengin medeniyetini numayış ete, – dedi öz çıqışında Meclis reisi Mustafa Cemilev. – Öz tarihiy Vatanımızğa kelip, biz çoqçerçiveli medeniyetimizni direm-direm ğayrıdan tiklemektemiz. Biz öz adetlerimiznen ğururlanıp, olarnı nesilden nesilge keçirmek kerekmiz. Bu iş variyetimizni saqlamaq ve zenginleştirmek imkânını berir”.

Meclis reisi eki aftadan soñra Aqmescitte Bütünqırım matem mitingi keçirilecegini de hatırlatıp, semetdeşlerimizni olduqça birlikli ve faal olmağa, 1944 senesi sürgünlikte qurban olğanlarnıñ hatırasını añmağa çağırdı.

Mamut-Sultan vadiysi cemaatını bunıñ kibi de İgor Budanov, Refat Çubarov, Safure Kacametova, ve Zevcet Qurtümerov hayırladılar ve Qırımnıñ bütün sakinlerine bereket ve biri-birine sayğı-ürmetnen yanaşmalarını tilediler. Bayramnıñ kontsert ve sport programalarınıñ iştirakçileri hatıra bahşışlarınen taqdirlendiler.

Malümat içün: Mamut-Sultan vadiysinde HIDIRLEZ bayramı Mamut-Sultan köy şurasınıñ yerli iş adamlarınen birlikte sotsial-iqtisadiy inkişafı programması çerçivesinde teşkil etildi.