Aqmescit – Qurman 3:1

25 Fevral 2012

Belli ki, futbol yüz yıldan ziyadedir ki dünyada sportnıñ eñ meraqlı ve eyecanlandırıcı çeşitlerinden biri sayıla. Bu fikirnen er kes razı, çünki bu ilim tarafından da isbat etildi. Qırımtatarları da futbol sevdaları ve yahşı oyuncı olğanlarını fevral 25 künü Qurman rayonınıñ Petrovskiy sport kompleksinde olıp keçken 40 ve bundan ziyade yaşlı futbolcılarnıñ yarışına kelgenler şahsen köre bildiler.

Futbol boyunca birinci qırımtatar cıyma taqımınıñ baş treneri, Ukrainada hızmet köstergen trener Rustem Osmanovnıñ hatırasına bağışlanğan yarış sobral Qırımnıñ sekiz regionından – yani Aqmescit, Curçı, Canköy, Seyitler, İçki, Qurman, Kezlev ve Qarasuvbazardan kelgen oyuncılarnı topladı.

Yarış ananege köre tedbir Ukraina ve qırımtatar halqınıñ milliy gimninden başlandı Soñra oyuncılarnı ve mühlislerni yarışnı keçirüv boyunca işçi gruppanıñ başı ve Aqmescit taqımınıñ kapitanı, Qırımtatar halqı Meclisi reisiniñ muavini Remzi İlyasov, Rustem Osmanovnıñ ömür arqadaşı Zarema Osmanova, oğulları Alen ve Lemar Osmanovlar (Lemar Aqmescit taqımında oynadı) ve digerleri selâmladılar. Meşur trenerniñ oğulları teşkilâtçılarğa böyle tedbirni keçirgenleri içün teşekkür bildirip, babalarınen ğururlanğanları ve ondan ibret alğanlarını söylediler. Çıqışlardan soñ yerli folklor ansambller halq oyunlarını ustalıqnen icra etip, er kesni sevindirdiler.

Böyleliknen, bir sıra tutuşuvlar neticesinde üçünci yer içün Canköy ve Qarasuvbazar taqımları yarışlaşıp, ğalebeni Qarasuvbazarlılar qazandı. Birinci yer içün yarış qonaqbayları ve Aqmescit taqımı küç sınaştılar. Aqmescit taqımı özüniñ küçlü olğanını numayış etti, zaten taqım erkânı professional oyuncılardan ibaret olıp, olar yahşı oyun kösterdiler.

Meselâ, birinci Seytler taqımınen olğan çarpışma 7:3 esabınen yekünlendi. Soñunda ise Qurman taqımı da küçlü ve munasip raqip olsa da, aqmescitlilerni yeñip olamadı. Aqmescit oyuncıları Qurmanlılarnıñ qapılarına 3 top kirsettiler.

Mezkür yarışnı keçirüv boyunca teşkiliy komitet reisiniñ yardımcısı Enver Emirasanovnıñ bildirgenine köre bu pek yahşı azırlanğan ve meraqlı oyun oldı. “Turnir yüksek seviyede ve pek dülber teşkilâtlandırılğanını qayd etmek isteyim. Oyuncılarnıñ episi küçlü, amma tutuşuvda daima bir ğalip ola. Bu sefer Aqmecitliler özlerini eñ küçlü taqım olaraq kösterdiler”, – dedi Emirasanov. Yarışnıñ soñunda tedbir iştirakçilerine yardıq ve diplomlar, ğaliplerge ise– Kubok berdiler.

“Avdet” gazetasınıñ materiallarından