Aqmeçit rayonında regional meclisniñ yañı erkânı şekillenip, reisi saylandı

04 Mayıs 2012

Belli ki, Aqmeçit rayonı regional mecliske saylavlar 2012 senesi aprel 7-de keçirilip, doquz yerli mecliske 53 aza seçildi. Böyleliknen, mezkür rayonnıñ bütün memuriy-territorial qurumlarında (Novoselskiy köy şurasından ğayrı) . yerli meclisler saylanıp, olar Regional konferentsiyağa qadar özleriniñ birinci toplaşuvlarını ötkerdiler ve reis em de kâtiplerni seçtiler.

2012 senesi aprel 29 künü olıp keçken Aqmeçit rayonı qırımtatarlarınıñ konferentsiyasında yerli meclislerniñ yañı saylanğan azaları delegat olaraq iştirak ettiler. “Qırımtatar halqı öz-özüni idare etüv yerli milliy organlar aqqında nizamname” boyunca Aqmeçit rayonı regional konferentsiyasını Yerli meclislerge saylavlarnı azırlav ve keçirüv boyunca komissiya kâtibi Zair Smedlâyev ve Saylav icra komitetiniñ azası Zevcet Qurtümerov alıp bardılar.

Regional konferentsiyanı alıp baruvnen bağlı teşkiliy meselelerden soñ onıñ delegatları Aqmeçit regional meclis reisini saylavğa keçtiler.

Şusı quvançlı ki, Aqmeçit regional meclis reisi alternativ şekilde saylandı. Gizli rey berüv neticelerine yekün çekilgen soñ bülletenlerge – haci Server Bavbekov, İsmet Selâmetov ve Şevket Smailovnıñ namzetleri yazılıp, eñ çoq rey qazanğan Şevket Smailov reis olaraq ilân etildi.

Soñra delegatlar regional meclisniñ yañı erkânını şekillendirmek qararını alıp, oña yañı saylanğan 9 nefer yerli meclis reisi ve bunıñ kibi regional meclis reisiniñ teklifine köre Arsen Cünevitov, Veli İbragimov ve Said Qurtaciyev kirsetildi.

Konferentsiyanıñ soñunda delegatlar qırımtatar halqı genotsidiniñ qurbanlarını añma merasimlerini keçirüvnen bağlı meselelerni muzakere etip, ait qararlar aldılar.