Aqmeçit rayonı Qunan köyünde cami açıldı

15 Noyabr 2013

Qırımda noyabr 15 künü Aqmeçit rayonı Qunan köyünde tantanalı sürette yañı cami açıldı.

Caminiñ tantanalı açılış merasiminde Qırım musulmanları müftisiniñ muavini acı Esadullah Bairov, Meclis reisiniñ muavinleri Zaur Smirnov ve Ayder Acimambetov, “Alraid” birleşmesiniñ reisi Muhammed Taha, Aqmeçit regionınıñ baş imamı Leman Abduramanov, Aqmeçit regional meclis reisi Şevket Smailov, köy sakinleri ve musafirleri iştirak ettiler.

100 musulmannı sığdırğan yañı cami Quveytteki “Beyt az-Zakât” hayriye teşkilâtınıñ maddiy yardımı, Qırım musulmanları diniy idaresi ve “Alraid” birleşmesiniñ qoltutuvında quruldı. Qurucılıq işleri bir yıl qadar devam etip, 800 biñ grivnâ menimesildi.

Qunan köyüniñ musulmanlarını Qırım Müftisi Emirali Ablayevniñ adından acı Edullah Bairov, Meclis reis Refat Çubarovnıñ adından ise Zaur Smirnov hayırlap, cami açılışı munasebetinen bahşışlar taqdim ettiler.

Bunıñ kibi de köylülerni Muhammed Taha, Şevket Smailov ve Leman Abduramanov hayırladılar.

Yerli musulman cemiyetiniñ azaları Muhammed Tahağa teşekkür bildirerek, qalpaq bağışladılar.

Caminiñ tantanalı açılışından soñ musulmanlar cuma namazını qıldılar. Qunan köyü sakinleri içün bayram sofrası donatıldı.

Foto: Qırım musulmanları diniy idaresiniñ matbuat hızmeti