Anna Fotıga ile körüşüv

25 Iyün 2017

İyün 24 Kyivdeki Qırımtatar Milli Meclisniñ işhanesinde qırımtatar halqınıñ yetekçisi, Ukrayina milletvekili Mustafa Cemilev ve Milli Meclisniñ reisi, Ukrayina milletvekili Refat Çubarovnıñ, Avropa parlamentiniñ vekilleri Anna Fotıga ve Petras Astraviçus ile körüşüvi olıp keçti. Körüşüvde ayrıca Milliy meclisniñ azaları da iştirak ettiler. Tedbir devamında taraflar Qırımdaki vaziyet, qırımtatar halqınıñ aqlarını qorçalav ve bu munasebetnen halqara cemiyetniñ areketlerini muzakere ettiler.

Ayrı diqqat Qırım yarımadasında peyda olğan ekologik vaziyetke berildi. İşğal altında bulunğan yarımadağa ve Donetsk ile Lugansk vilâyetlerniñ ayrı rayonlarına ketirilgen ekologik zararlarnen bağlı halqara mahkemege berilecek vesiqalarnıñ azırlanuvı mevzusı da elge alındı. Subetdeşler, Qırımda aqsız ve uquqsız mahkeme davalarını alıp barğan işğalcilerge qarşı sanktsiyalarnıñ keñleştirilmesi ve bu yönelişteki işlerniñ birlikte yapılmasınıñ kerek olğanını qayd ettiler. Refat Çubarovnıñ fikirine köre, Ukrayina vatandaşlarına qarşı adaletsiz mahkeme davalarında iştirak etken şahıslar Avropanıñ ve diger ecnebiy memleketlerniñ sanktsiyon cedvellerinde bulunğanlarını, ya da Ukrainada bu munasebetnen açılğan cinaiy işlerde qabaatlı olaraq qayd etilgenlerini ne qadar yahşı idraq etseler, Qırımnıñ Ukrayinağa qaytarıluvı o qadar tez kerçekleşecek.

Körüşüvge qolşulğan taraflar, Ukrayina devlet sıñırları içinde qırımtatar milliy-territorial cumhuriyetniñ teşkil etilüvi aqqında Ukrayin Anayasasınıñ “Qırım Muhtar Cumhuriyeti” bölügine kerekli deñişüvler eñ yaqın kelecekte kirsetilecek, diye ümüt etkenilerini bildirdiler.

Subetniñ soñunda qırımtatar halqınıñ lideri Mustafa Cemilev aily musafirlerge “Nezlamnıy” adlı avtobiografik kitapnı ediye etti.