Ankarada «Qırımoğlu… Bir halqnıñ küreşi» filmi taqdim etildi

30 March 2013

2013 senesi mart 28-de Ankarada Türkiye Odalar ve Borsalar Birliği meclisler salonında “Qırımoğlu… Bir halqnıñ küreşi” filminiñ taqdimine bağışlanğan tantanalı aqşam olıp keçti

Film millet lideri ve belli siyasiy erbab Mustafa Cemilevniñ taqdirinde seyircilerni 1944 senesi mayıs ayında Qırımdan sürgün etilgen qırımtatar halqınıñ facialı taqdiri ve onıñ Vatanğa qaytuv ve aqlarını tiklev oğrunda cesürane küreşinen tanış ete.

“Qırımoğlu… Bir halqnıñ küreşi” filmi – qırımtatar halqınıñ HH asırda facialı taqdiri, Qırımda öz aqalarınıñ tiklenilmesi içün küreşi ve bugünde-bugün Ukrainada inkişaf etmesi içün areketi aqqında filmler türküminiñ başıdır. Bu TRT Türkiye devlet televizion kanalınıñ belli rejissörları Neşe Sarısoy ve Zafer Qaratay ğayesiniñ birinci filmidir. “Qırımoğlu… Bir halqnıñ küreşi” filminiñ tanıtımı resmiy seviyede teşkil etilip, sanada Türkiye ve Ukraina bayraqları qoyuldı.
Tedbir qırımtatar dernekleriniñ yolbaşçıları Tuncer Kalkay, Celâl İçten, Recep İçin ve diger aktif insanlarnıñ yardımında keçirildi.

Film tanıtımında Türkiye baş nazir muavini Bülent Arınç, Türkiye Odalar ve Borsalar Birliği Başqanı Rifat Hisarcıklıoglu, Radio ve televizion Yuqarı Şurasınıñ baş direktorı Davut Dursun, “TRT” Türkiye devlet televizion kanalanınıñ baş direktorı İbraim Şahin, paytaht akimleriniñ vekilleri iştirak ettiler.
Bunıñ kibi de Ukrainanıñ Türkiyedeki Vefqulade ve Tolu vekâletli Elçisi Sergey Korsunskiy, Elçilikniñ birinci kâtibi Denis Zolotaröv teşrif buyurdılar.

Qırımdan ise Ukraina halq deputatı, Meclis reisi Mustafa Cemilev reberliginde delegatsiya erkânına reisniñ refiqası Safinar Cemileva, Türkiye Cumhuriyetiniñ Qırımdaki Fahriy Konsulı Seyran Osmanov, QHA İnformatsion agentlikniñ koordinatorı, Meclisniñ Türkiye meseleleri boyunca yardımcısı İsmet Yüksel, Meclisniñ Tışqı alâqalar bölüginiñ başı Ali Hamzin, Meclis azası, Aqmescit şeer şurasınıñ deputatı Sadıq Tabah, Kiyevdeki qırımtatarlar cemiyetiniñ reisi Aslan Ümerov, “ATR” kanalınıñ saibi Lenur İslâmov, Aqmescit şeer şurasınıñ deputatı Seytumer Berberov, Yalta şeeri “Dereköy” qırımtatar etnografiya merkeziniñ başı Zarema Mensitova, Qurultay delegatları, iş adamları Rustem Ümerov, Bekir Ğaniyev ve Moskva şeerinde yaşağan qırımtatarlarnıñ vekili, iş adamı Emil Aliyev kirdiler.

Tantanalı tedbirni açqan Türkiye baş nazir muavini Bülent Arınç dedi ki “Türkiye içün yaqın olğan qırımtatar halqınıñ facialı taqdiri – türk halqınıñ da tınmağan ağrısıdır”. Türk dünyasınıñ büyük oğlu, dünya demokratik küçlerniñ itibarını qazanğan Mustafa Abdulcemil Qırımoğlu, Vatanğa qaytmaq içün sovet rejimine qarşı küreşken qırımtatar halqınıñ milliy areketi aqqında film çıqarmaq – bu yalıñız TRT devlet televizion kanalınıñ degil de, Türkiyeniñ 75 million sakinleriniñ de işi olmadıdır.

Arınç şunı da qayd etti ki, Mustafa Abdulcemil Qırım öglu Türkiyeniñ tanılmış milliy qaramanı olaraq öz halqınıñ aqları içün küreşinen türk cemaatçılığınıñ sayğısını qazandı. “Bu film Qırımnıñ biñlernen insanları Vatan içün küreşkenleriniñ, küreş oğrunda canlarını feda etkenleri, qurban olğanlarınıñ simvolı olğanını isterdik. Bu filmni bütün dünya seyir etmesini isteymiz. Bugünde-bugün TRT telekanlanıñ yayınlarını bütün dünya izelemekte. Allah nasip etse, biz bu filmni bir çoq tillerge çevirip, cemi kanallarımızda yayınlamaq isteymiz”, dedi Bülent Arınç.

Türkiye baş nazir muavini 2005 senesi yani Viktor Yuşçenko Ukraina Cumhurbaşqanı olaraq seçilgende, kendisi ise Türkiye Büyük Millet Meclisi reisi olğanda yüz bergen bir vaqianı ayrıca hatırladı: “Ukrainanıñ yañı saylanğan Cumhurbaşqanı Viktor Yuşçenko ziyaretime keldi. Men onıñ şerefine ziyafet teşkil ettim. Onda bizim Cumhurbaşqanımız da bar edi. Diplomatik qaidelerge uyacaq-uymaycağını tüşünmeden oña böyle hıtap ettim: “Sayğılı cenap Yuşçenko, Mustafa Cemilev – bütün türkiy halqlarnıñ qaramanıdır. Biz epimiz onı sevemiz ve ürmet etemiz. Eger onıñ canını ağırtsañız, demek bizim de canımız ağırır. Eger onıñ keyfini bozsañız, bizim de keyfimiz bozulır. Eger siz Türkiye ile işbirlik qurmaq isteseñiz, qırımtatar halqına nisbeten davranışlarıñıznı Mustafa Cemilev qabul etmek kerek. Bizim işbirligimiz siziñ Mustafa Cemilevge munasebetiñizge bağlıdır.” dedi Bülent Arınç. Bunıñnen bir sırada o, SSSRniñ diger sürgün etilgen halqları, cümleden ahiskalı türkler de göñüldeşlik ve yardımğa muhtacj olğanşlarını qayd etti.

Çıqışınıñ soñunda Türkiye baş nazir muavini Ukraina Elçisi Sergey Korsunskiyge film tanıtımında şahsen iştirak etkeni içün teşekkür bildirip, ukrain akimiyetiniñ müsbet munasebetine nail olğan qırımtatar halqı eki taraflı strategik munasebetler inkişafı ve dostluğınıñ köpüri olabilir, Ukrainanıñ bugünki yolbaşçıları bunı da mıtlaqa esapqa almalılar, dedi.

TRT Baş direktorı İbrahim Şahin öz çıqışında Türkiyeniñ devlet kanalı bütün türk halqı adından öz borcunı eda etkeninden ğurur duyğanını söyledi. Onıñ qayd etkenine köre, film müellifleri kerçek adise ve vaqialarnı aks ettirgenler ve bu işniñ devamı olaraq daa bir qaç seriyasını çıqarmaq planlaştırıla.

Türkiye Odalar ve Borsalar Birliği başqanı Rifat Hisarcıklıoglu filmniñ tanıtımı aynı olarnıñ salonında keçirilgeninden özüni bahtlı sayğanını bildirdi. “Film Qırım ve Cemilevniñ küreşi aqqında ikâye etkeninden ğayet mutlum. Bizim nesilimiz içün o öz halqına hızmet etüvniñ nümünesidir. Mustafa Cemilev menim içün üyken ağam, cesürlik simvolıdır. Ne qadar eziyetleseler de iç bir zaman bükülmedi. Eñ ağır zamanlarda bile tek barışıq tilinde qonuşmağa tırıştı. O öz aqlarını zorluq ile degil de, ğayelerinen yeñdi”, dedi Rifat Hisarcıklıoglu. Soñunda R. Hisarcıklıoglu Mustafa Cemilevge hıtap eterek “Siziñ küreşiñiz –bizim küreşimizdir” dedi.

Bütün bu çıqışlarğa cevaplanğan Mustafa Cemilev qırımtatar halqı ve onıñ vekâletli organı olğan Meclis adından film yaratıcılarına, ayrıca Türkiye Cumhuriyetine ve TRT devlet televizion kanalına teşekkür bildirip, halqınıñ Qırımğa qaytarılması oğrunda küreşken yüzlernen- biñlernen faallerniñ hatırasına ürmet köstergen bu filmniñ müimligini qayd etti.

“Bizim yekâne arzumıznen Allahqa yalvarıp dua ettik ki, bizge Vatanğa ölmekni nasip eylesin. Allahqa şükürler olsun, biz arzumızğa iriştik ve Vatanğa qayttıq”, – dedi Cemilev.

Filmniñ çeşit tillerde kösterilmesi Qırımda öz milliy haqları içün küreşken halqnıñ areketine müim isse qoşar, dep qyd etti Cemilev.
“Barsın, demokratik cenk mına böyle – qan tökülmeden olsun”, – dedi M. Cemilev.

Çıqışlardan soñ Qırımtatar halqı Meclis ive Türkiye akimiyeti vekilleri adından hediyeler berüv merasimi başlandı.