Ankara Ahmed İhsan Qırımlını soñki yolğa ozğardı

14 Dekabr 2011

Ankara şeerindeki Qocatepe camisinde 13 dekabr künü Türkiyeniñ sabıq Turizm naziri, Qırımtatar medeniyeti ve yardımlaşma cemiyetiniñ reisi doktor Ahmed İhsan Qırımlınıñ cenaze namazı qılındı. Namazdan soñ anda bulunğanlar merhumnıñ ömür arqadaşı Çiçek Qırımlı, oğulları Haqan ve Cihanğa emirallah aytıp, baş sağlığı bildirdiler.

Vedalaşuv merasiminde Türkiye Tışqı işleri naziri Ahmet Davutoglu, Türkiye Turizm ve medeniyet naziri Ertugrul Günay, Milliy Hareket partiyasınıñ başı Devlet Bahçeli, Türkiye Demokratik partiyasınıñ yetekçisi Namık Kemal Zeybek, bunıñ kibi de bir çoq eski ve bugünki deputatlar iştirak ettiler.

1987 senesinden Qırımtatar medeniyeti ve yardımlaşma dernegine yolbaşçılıq yapqan Ahmed İhsan Qırımlınen Qırımdan kelgen delegatsiya da vedalaştı. Qırım delegatsiyası Qırımtatar halqı Meclisiniñ reisi Mustafa Cemilev, Bütündünya qırımtatarlar kongressiniñ prezidenti Refat Çubarov, Türkiyeniñ Aqmescitteki fahriy konsulı Seyran Osmanov, Meclis reisiniñ mesleatçısı İsmet Yüksel, “Krım” devlet teleradio kompaniyası qırımtatar tilinde programmaları icadiy birleşmesiniñ direktorı Seitislâm Kişveyev, “Bizim Qırım” gençler halqara cemaat teşkilâtınıñ reisi Abduraman Egizden ibaret edi.

Cenaze namazından soñ Ahmet Davutoglu, Ertugrul Günay, Devlet Bahçeli ve Mustafa Cemilev tabutnı arabağa qoydılar. Ahmed İhsan Qırımlı Balıkesir şeerinde defn etilecek.

“QHA” informatsion agentliginiñ materialları esasında