Ana tili ve milliy tasil inkişafı oğrunda

09 Fevral 2012

2012 senesi fevral 7 künü Qırım Muhtar Cumhuriyeti Yuqarı Şurası Milletlerara munasebetler ve sürgün olunğan grajdanlarnıñ meseleleri boyunca Daimiy komissiyanıñ reisi, Milliy Meclis reisiniñ muavini Remzi İlyasov qırımtatar tili inkişafı boyunca tedbirlerniñ neticeleri boyunca ve qırımtatar tilinde tasil inkişafınıñ meselelerine bağışlanğan toplaşuv ötkerdi.

Toplaşuvda Qırım Yuqarı Şurasınıñ deputatı, Meclis azası, “Maarifçi” birleşmesiniñ reisi Safure Kacametova, Milletlerara munasebetler ve sürgün olunğan grajdanlarnıñ işleri boyunca cumhuriyet komitetiniñ reisi Edem Dudakov, Qırım Tasil ve ilim, yaşlar ve sport nazirligi Qırımtatar tilinde tasil bölüginiñ müdiri Zarema Suleymanova, Qırımtatar yazıcılar birliginiñ reisi Riza Fazıl, “Qırım”, “Yañı dünya” gazetaları ve “Yıldız” mecmuasınıñ baş muarrirleri, radio, televideniye, cemaatçılıq vekilleri iştirak ettiler.

Toplaşuv iştirakçileri keçken sene yapılğan işlerge yekün çektiler, Qırım Tasil ve ilim, yaşlar ve sport nazirliginiñ Qırımtatar tilinde tasil bölügi qırımtatar tilinde tasil inkişafınıñ maqsadlı devlet programmasınıñ leyhasını işlep çıquv boyunca işçi gruppasınıñ faaliyeti aqqında malümat berdi, bu mesele boyunca problemalar ve olarnı halqara teşkilâtlarnıñ tevsiyeleri çerçivesinde çezüv imkânları muzakere etildi, qırımtatar tiliniñ inkişafında ve qırımtatar tilinde oqutılğan mekteplerniñ tiklenüvinde halqara teşkilâtlar, devletler ve sponsorlarnıñ qoltutuv ameliyatı ögrenildi.

Toplaşuvnıñ neticeleri boyunca diñlengen malümatlarnı umumiyleştirmek ve menfaatdar şahslarnıñ, ocalarnıñ ve cemaatçılıqnıñ keniş iştirakinde umumcumhuriyet toplaşuvını azırlamaq qararı alındı.

Toplaşuv iştirakçileri İ. Gasprinskiy adına kitaphane, “Maarifçi” birleşmesi ve Qırımtatar yazıcılar birligi Halqara Ana tili kününe (fevral 21-de) bağışlap keçirecek tedbirni de maqullediler.