Amdi Giraybay – qırımtatar şiiriyetiniñ zumrüt tacı

16 Dekabr 2011

Dekabr 15 künü bu şiar altında Qarasuvbazarda halqımıznıñ büyük şairi Amdi Geraybaynıñ 110 yıllığına bağışlanğan tantanalı yubiley merasimi olıp keçti.

Amescitten kelgen teşkiliy komissiya azaları: Qırım Yuqarı Şurasınıñ milletlerara munasebetler ve sürgün olunğanlarnıñ problemleri boyunca daimiy komissiyasınıñ reisi, Milliy Meclis reisiniñ muavini Remzi İlyasov, Qırım Yuqarı Şurasınıñ deputatı, “Marifçi” birleşmesiniñ başı Safure Kacametova, Reskomnats reisiniñ muavini Emine Avamileva, Qırımtatar yazıcıları birliginiñ reisi Riza Fazıl, Qarasuvbazar şeer golovasınıñ muavini Akim Çolakayev, “Yıldız” mecmuasınıñ baş muarriri Dilâver Osman iştirak ettiler.

Olar, em de avtobusnen kelgen bir çoq cemaat teşkilâtlarınıñ, televideniye ve gazeta muarririyetleriniñ vekilleri, yerli cemaatçılıq ve şeer golovası  Albert Kangiyev  başta Amdi Geraybay yaşağan ve Hatıra tahtası qoyulğan evni ziyaret etip, anda güldesteler ve çeçekler qoydılar. Soñra yubiley merasimi şeer muzıka mektebiniñ salonında keçirildi.

Muzıka mektebiniñ foyesinde kitap ve matbuat materiallarından “İ.Gasprinskiy adına Qırımtatar milliy kitaphanesi”nen Amdi Giraybaynıñ ayatına bağışlanğan  sergi teşkil etildi.

Milliy kitaphanesiniñ hadimleri sergi aqqında ikâye ettiler ve suallerge cevap berdiler.

Sananıñ art divarı Amdiy Giraybaynıñ büyük portretinen, “Amdi Girabay”, “110 yıl” sözleri ve “Qırımtatar şiiriyetiniñ zumrüt tacı” kibi şiarnen bezetilgen.

Sanada belli söz ustası, Özbekistanda nam qazanğan artist Riza Yusufnıñ eyecanlı sesi yanğıray. O, Amdi Giraybaynıñ “Yaş tatarlarğa” şiirini oquy. Soñ merasimni alıp barğan Dilâver Osman yubiley merasimini açmaq içün sanağa Teşkiliy komitetniñ reisi Remzi İlyasovnı davet ete. Soñra teşkiliy komitet kâtibi Safure Kacametova ve teşkiliy komitet azası Emine Avamileva, Qarasuvbazar rayon memuriyetiniñ başı Albert Kangiyev Amdi Giraybaynı añıp, merasim iştirakçilerini selâmladılar.

Amdi Giraybaynıñ ayatı ve icadı aqqında Riza Fazıl, professor İsmail Kerimov, “Marifçi” birleşmesiniñ azası edebiyatşınas Şefiqa Abduramanova sözge çıqtılar.

Tantanalı merasimniñ bediiy qısmını Qırımda nam qazanğan artist Rustem Memetov (“Dertli qaval” ve “Tuvğan yerim yeşil Qırım” yırlarınen), bestekâr ve yırcı Edip Bağçasaraylı (özüniñ “Kiçkene sözler” ve “Milletim”yırlarınen) yaraştırdılar.

Qarasuv mektepleriniñ talebeleri, “Yeşil ada” ansambliniñ azaları “Namuslı qız”, “Qarasuvnıñ dört köşesi” oyunlarını numayış ettiler ve Amdi Giraybaynıñ “Ketme, balam, ayıptır” şiirini sanalaştırıp icra ettiler. Qırım müendislik-pedagogika universiteti fililogiya fakultetiniñ 3-nci kurs studenti Viktoriya Yetçinova ise (ukrain qızı) Amdi Giraybaynıñ “Cigitke” ve “Ana tilim” şiirlerini çoq güzel etip oqudı.

Merasimniñ soñunda alıp barıcı Dilâver Osman yubiley merasimine yekün çekerek, teşkiliy komitet azalarını sözge çıqqanlarnı ve yubiley tedbirlerinde faal iştirak etkenlerni sanağa davet ete ve bütün teşkilâtçılarğa: Teşkiliy komitet reisine ve azalarına, Qırımtatar yazıcıları birligine, “Marifçi” birleşmesine, milliy kitaphanesiniñ vekillerine, Qarasuvbazar şeer memuriyetine, yubiley merasimlerine maddiy qol tutqan Reskomnatsqa ve yerli iş adamlarına, em de Qarasuvbazar “Qardaşlıq” teşkilâtı azalarına teşekkür bildire. Soñra bazı insanlarğa ayrıca minnetdarlıq bildirile.

Remziy İlyasov Qarasuvbazarda Amdi Giraybay adına hayriye fongdını teşkil etken iş adamı Riza Zaitke Meclisniñ Şeref yarlığını, Safure Kacametova yubiley tedbirlerinde faal iştiraki içün “Marifçi” birleşmesiniñ Qarasuvbazar bölüginiñ reis muavini Vade Ametovağa Birleşmeniñ Şeref yarlığını, Emine Avamileva ise Qarasuvbazar şeer golovasınıñ muavini Akim Çolaqayevge Reskomnatsnıñ Teşekkürnamesini taqdim ettiler.

Bu arada “Bayraq marşı” yañğıray ve sanda yuqarı sınıf talebeleri milliy bayraqlarnı köterip, yelpiretip turalar.

Şairniñ yubileyi gürdeli bir bayram merasimine çevirildi. Er kes ğayet hoş duyğularnen dağıldılar.

Foto:  Marifçi,

Zarema Yaliboylu