Aluştada «Çatır-Dağ» qırımtatar medeniy merkezi açıldı

07 Noyabr 2011

Qurban bayramınıñ birinci künü Aluştada “Çatırdağ” qırımtatar medeniy cemiyetniñ medeniy merkezi tantanalı sürette açıldı.

Merkezniñ tantanalı açılış merasiminde Qırımtatar halqı Meclisiniñ reisi Mustafa Cemilev, Aluşta şeeriniñ başı Stanislav Kolot, “Qırım inkişafı fondı” Hayriye teşkilâtınıñ Prezidenti ve baş direktorı Rustem Ümerov ve Aleksey Skorik, Hocaeli qırımtatar yardımlaşma ve medeniyeti derneginiñ reisi İbraim Aracı, Aluşta şeerindeki milliy medeniy cemiyetlerniñ ve yerli cemaatçılıq vekilleri iştirak ettiler.

Açılış merasiminde çıqışta bulunğan Qırımtatar halqı Meclisiniñ reisi Mustafa Cemilev semetdeşlerini başta Qurban bayramınen hayırlap, er bir qırımtatar ailesine barışıqlıq ve bolluq tiledi.

“Qırım Cenübindeki şeerlerniñ birinde, Aluştada medeniy merkezniñ açılması qırımtatar halqınıñ ömürinde parlaq vaqiadır, çünki ösip keleyatqan nesil öz urf-adetleri, eski ananelerni ve ana tilini ögrenmek imkânına malik olacaq”, -dedi M.Cemilev. Meclis reisiniñ fikrince, merkez semetdeşlerniñ birleşmesini, medeniyetniñ inkişafını temin etip, halqqa milliy özgünligini qorçalavda siltem olur.

Qırımtatar halqı Meclisiniñ adından Mustafa Cemilev “Çatırdağ” medeniy merkezniñ açılışına isse qoşqanlarnıñ episine minnetdarlıq bildirip, “Qırım inkişafı fondı”nıñ hızmetini ayrıca qayd etti”. “Eminim ki, kelecekte böyle merkezler Qırımnıñ bir çoq yerlerinde peyda olurlar”, – dedi Meclis reisi M.Cemilev.

“Çatır-Dağ” cemiyeti ve Aluştadaki qırımtatar ealisiniñ çoqyıllıq arzusı yerine keldi”, – dedi Aluştadaki “Çatırdağ” qırımtatar milliy medeniy merkez idaresiniñ başı Seit-Yağya Kazakov tedbirniñ tantanalı qısmını açarken. – “Qırım inkişafı fondı” hayriye teşkilâtınıñ ve Aluşta şeer şurasınıñ yardımı sayesinde mubarek Qurban bayramı kününde qırımtatar halqınıñ daa bir medeniy ocağını açmaqtamız” S.Kazakovnıñ aytqanına köre merkezniñ leyhası balalar etnografik – folklor mektebi, qırımtatar tilini ögrenüv kursları, qadınlar klubınıñ açılmasına ve bunıñ kibi de Aluşta qartlar klubınıñ faaliyetini devam ettirmege imkân berecek.

Aluştada yaşağan semetdeşlerni Qurban bayramı ve medeniy merkez açılmasınen hayırlağan “Qırım inkişafı fondı” hayriye teşkilâtınıñ prezidenti Rustem Ümerov de Meclis reisiniñ fikrine qoşulırken, merkezniñ baş vazifesi qırımtatar halqınıñ milliy özgünligini saqlamaq ve pekitmek olğanını qayd etti. “Bizim fondımız ileride de milliy-medeniy degerliklerni inkişaf ettirüvnen bağlı teşebbüslerge qoltutmaq maqsadında, dedi Ümerov. “Qırım inkişafı fondı” hayriye teşkilâtınıñ prezidenti Aluşta regionında qırımtatarlar toplu yaşağan yerlerde bu kibi merkezlerniñ açılmasına qoltutmağa azırlığını bildirdi.

Aluşta şeeriniñ başı S.Kolot “Çatır-Dağ” medeniy merkezi Aluşta regionında milliy ve medeniy alâqalarnıñ qaviyleştirüvde, milletler ve dinlerara munasebetlerni daa da eyileştirüvde örnek olacağına eminligini ifade etti.

Aluştada medeniy merkezniñ açılmasına destek köstergenlerge teşekkür sözlerini Hocaeli derneginiñ başı İbraim Aracı da bildirip, er kesni Qurban bayramınen hayırladı. “Ananelerni saqlav ve yaş nesilge aşlav qırımtatar halqınıñ tarihı ve medeniyetini canlandıruv işine qoşulğan büyük issedir”, – dedi İ. Aracı.

Meclis reisi Mustafa Cemilev Aluşta meri Stanislav Kolot ile birlikte ananeviy qırmızı şeritni kesip, Aluşta sakinleri ve musafirleri içün “Çatır-Dağ” merkeziniñ qapılarını açtı.

Öz nevbetinde “Çatır-Dağ” Aluşta qırımtatar milliy medeniy cemiyetniñ başı Seit-Yağya Kazakov medeniy merkezniñ odalarını kosterdi. Soñra Qurban bayramı ve merkez açlışı munasebetinen bayram sofrası donatıldı.