«Alraid» Qurultay delegatları ve musafirlerine iftar berdi

21 Iyül 2012

İyül 21-de muqaddes Ramazan ayınıñ 2-nci künü, U Qurultay 4-nci sessiyasınıñ birinci künü Bütünukrain cemaat teşkilâtlarınıñ “Alraid” birligi “Ayşe” restoranında iftar berdi.

İftarda Meclis reisi Mustafa Cemilev, onıñ birinci muavini Refat Çubarov, Bütünukrain cemaat teşkilâtları “Alraid” birligi Qırım bölüginiñ reisi doktor Mohamad Taha, Meclis azaları ve Qurultay 4-nci sessiyasınıñ musafirleri, “Alraid” birligi ve qırımtatar cemaat teşkilâtlarınıñ vekilleri bulundılar.

Bunıñ kibi de iftarğa Mısırdaki Al-Azhar universitetiniñ vekili, şeyh Tariq Anafi teşrif buyurdı. Al-Azhar universiteti Kahiredeki eñ nufuzlı ve eski musulman diniy akademiyalarından biridir.

Doktor Taha tarif etkenine köre şeyh Tariq Anafi muqaddes Ramazan ayı devamında Qırımda bulunıp, “Alraid” camisinde lektsiyalar oquycaq. Al-Azhar universitetiniñ vekili şeyh Tariq Anafi iftarda bulunğanlarnıñ episini Ramazannen hayırlap, Qurultaynıñ ve Meclisniñ işine muvafaqiyetler, bütün qırımtatar halqına eyilikler tiledi.