Almaniya qırımtatarlar diasporası Anatoliy Mogilövnı istifağa çıqarmaqnı talap ete

21 May 2013

O künü yağğan küçlü yağmurğa baqmadan mayıs 18 munasebetinen teşkil etilgen miting Berlinde Ukraina elçiligi binasınıñ qarşısında keçirildi.

Başqa devletlerde olğanı kibi 2013 s yenesi mayıs 18-de Berlinde olğan mitingniñ iştirakçileri Qırım baş naziri Anatoliy Mogilövnıñ istifağa çıqarılmasını talap ettiler.

Bu aqta Ğarbiy Avropa qırımtatar medeniy ve yardımlaşma merkeziniñ başı Rafet Qaranlıq bilddirdi. Milliy gimnden başlanğan miting iştirakçileri 1944 senesi sürgünlik qurbanlarını bir daqqalıq sukünet ile añdılar.

Soñra elçilik binası qarşısında çeçek qoydılar. Ukrainanıñ Almaniyadaki elçiligine Qırım baş naziri A. Mogilövnıñ istifağa çıqarılması talabı ile mektüp yollanıldı.

Ğarbiy Avropa qırımtatar medeniy ve yardımlaşma merkeziniñ başı Rafet Qaranlıq qırımtatar halqınıñ sürgünligi soyqırımdır, dedi ve qırımtatarlarnıñ sürgünligi Avropada soyqırım olaraq tanılması içün er şeyni yapacaqlarını işandırdı.

R. Qaranlıq bunıñ kibi şunı da qayd etti ki, Qırımda vaziyetni kerginleştirgen baş nazir A. Mogilövnıñ faaliyetine soñ berilmek kerek. Qırımda ve Avropa ülkelerinde yaşağan qırımtatarlar Milliy Meclis ve Qurultayğa daima qoltutacaqlarını bildirdi.

Şunı hatırlatmalı ki. Qırımtatar halqınıñ matem kününde Avropa Birligi devletlerinde yaşağan qırımtatar diasporasınıñ teşkilâtları soyqırım qurbanlarını añdılar ve qırımtatar halqı aqlarınıñ öz Vatanı Qırımda ve Ukrainada qorçalanmasını talap ettiler.