ALİYE HANIM ÇİYGOZNIÑ VEFATI MUNASEBETİNEN AQRABA VE YAQINLARI İLE SEMETDEŞLERİMİZGE TAZİYE

02 Iyül 2017

İyül ayınıñ 2-sinde gece, uzun ve ağır hastalıqtan soñ Qırımtatar Milli Meclisniñ reis muavini Ahtem Çiygoznıñ anası – Aliye hanım Çiygoz vefat etti.

Aliye hanım 1941 senesinde Aluştanıñ Körbek köyünde dünyağa keldi. 1944-niñ mayıs ayında, üç yaşında bala olıp, bütün halqınen beraber Qırımdan sürgün etildi. Aliye hanım ve qorantası – ömür arqadaşı Zeytulla efendi ve dört evlâdınen beraber Qırımğa ancaq on yıllar keçken soñ qayta bildi. Olar Bağçasaraynıñ Topçikoyünde yerleştiler.

Çiygozlerniñ ailesi Qırımtatar Milli Areketinde bir taraftan Zeytulla ağa ve oğulları Rustem (1963-2010) ile Ahtemniñ faaligi ve cesürliginen, diger taraftan Aliye hanım ve qızları Lennara ile Elmiranıñ ikmeti ve fedakârlığınen belli.

Çiygozlerniñ büyük ve qaviy qorantası ögündeki yañı sınavlar, er bir qırımtatar qorantasında ve bütün Qırımda olğanı kibi, Rusiye tarafından Qırımnıñ muvaqqat işğalinden soñra peyda oldı.

Qırımtatar Milli Meclisniñ reisi Refat Çubarovnıñ Qırımğa kirişi yasaq etilgeni sebebinden onıñ vazifesini eda etken Ahtem Çiygoz, 2015 senesi yanvar aynıñ 29-nda aqsız surette apis etildi ve rus işğalci akimiyet tarafından “kütleviy çatışmalarnı teşkil etüv”nen qabaatlandı. İşğalcilerniñ bu uquqsız qabaatlavı, 2014 s. fevral 26 künü Ukrayinanıñ topraq bütünligine qol tutmaq maqsadı ile Milli Meclis tarafından keçirilgen kütleviy barışıq mitinginen bağlı.

O künden soñ keçken 2 buçuq yıldan berli Ahtem Çiygoz azatlıqtan mahrum vaziyette.

Bir qaç ay evel ekimler Aliye hanım Çiygozde tedaviyge tabiy olmağan ağır hastalıqnı teşhis ettiler. Halqara cemiyetniñ tazıyıqı, Milli Meclis, Ukrayina Yuqarı Şurasınıñ insan aqlarından mesül hadimi ve uquqqorçalayıcı teşkilâtlar köstergen ğayretler neticesinde rus işğalci akimiyet Ahtem Çiygoz ile anasına tek 10 daqqalıq körüşüvge izin bermege mecbur oldı.

Qırımtatar Milli Meclisi, Qırımtatar Milli Qurultaynıñ vekilleri, milli areketniñ faalcileri, Umumdünya Qırımtatarları Kongressiniñ teşkilâtları Zeytulla ağağa, Ahtem Çiygozge, Çiygoz Lennara ve Elmira hanımlarğa, torunlarına ve merhum Aliye hanım Çiygoznıñ bütün aqraba-yaqınlarına eñ teren taziyelerni bildireler.

Milletimizniñ Başı Sağolsun!
Allah rahmet eylesin!

Qırımtatar Milli Meclisi,
Kyiv – Bağçasaray
2 iyül (oraq ayı) 2017s.