Ali Osman Bekmambet: Qırım üzerinde evelkisi kibi tamğalı kök bayrağımız kene tiklenecek zaman kelecegine eminim

25 Iyün 2012

İyün 24 künü Qırımtatar halqı Meclisiniñ Ali Hamzin, Zaur Smirnov, Bekir Ğaniyevden ibaret delegatsiyası ve Romaniya Türk-tatar demokratik birlikniñ vekili Ablez Aydın Köstencede bu yılnıñ mayıs ayında 100 yaşını toldurğan qırımtatar halqı milliy areketiniñ iştirakçisi Ali Osman Bekmambetni yoqladılar. 

Qırımdan kelgen musafirler Meclis ve onıñ reisi adından hayırlav ve eñ eyi tileklerni bildirip, Qırımtatar halqı Ali ağa Bekmambetniñ milliy areketteki hızmetine pek yüksek qıymet keskenini ayttılar. Ali Osman Bekmambet –Cafer Seydamet, Müstecip Ülkusal kibi milliy areket iştirakçilerinen şahsen körüşken-çalışqan küreşçilerden birisidir.

Ekinci cian cenki ve qırımtatarlarnıñ sürgünliginden soñ Dobrucada qaçaqlar sıfatında yaşağan qırımtatarlarnıñ qurtarılması oğrundaki areketleri içün Ali ağa 1951 senesi Romaniya kommunist rejimi tarafından 20 yılğa mahküm etildi. 13 yıldan apste oturıp çıqqan Ali ağa 1964 senesi azatlıqqa çıqarıldı. Cesürligi ve metaneti içün halq arasında büyük itibar qazandı. etildi. 

Delegatsiya azaları Ali Osman Bekmambetke Mustafa Cemilevniñ hayırlav mektübini ve Meclisniñ Fahriy yarlığını taqdim ettiler. 

Böyle diqqat ve sayğığa ğayet sevingen qart milletçi böyle dedi: “Men qırımtatar halqınıñ başına tüşken pek çoq azap-uqubetlerniñ şaatım. Şulardan eñ deşetlisi – sürgünliktir. Bugünde-bugün 1917 senesini Qurultayınıñ işini devam etken Qurultay ve Meclis faaliyet kösterir eken, halq kene ayaqqa qalqıp öz aqlarını tikleycegine, Qırım üzerinde evelkisi kibi tamğalı kök bayrağımız kene tiklenecek zaman kelecegine eminim!”