Ali Hamzin: II Dünya qırımtatarlar kongressiniñ Romaniyada keçirilmesini müim strategik ğaye, dep bilem

09 Sentâbr 2013

Er sene ötkerilgen bu festivalni Romaniya musulman türk-tatar demokratik birligi Romaniya devletiniñ qoltutuvında teşkil ete. Onda Bulğaristan, Makedoniya, Türkiye ve Qırım, bunıñ kibi de Romaniyanıñ qırımtatarlar topnen yaşağan şeerlerinden folklor taqımları iştirak ettiler.

Meclis tışqı alâqalar bölüginiñ başı Ali Hamzin reberliginde 35 adamdan ibaret Qırım delegatsiyası erkânında Meclis azaları Zevcet Qurtümerov ve Bekir Mamutov, “Maarifçi” birleşmesiniñ azaları Svetlana Resutova ve Melek Alidinova, qırımtatar cemaat ve icadiy teşkilâtlar. “Güldeste” ansambli (reberi Elzara Asanova), “Maqam” ansambli (reberi Cemil Karikov) bar ediler.

Festivalniñ birinci künü tedbirge kelgen delegatsiyalar şeerniñ merkezinde yürüş yaptılar. Numayışnıñ başında Türkiyeniñ meşur “Mehter” arbiy-etnik orkestri ketip, türk halqlarınıñ marşlarını icra etti. İştirakçiler şeerniñ Medeniyet sarayı ögünde toqtaldılar. Romaniya musulman türk-tatar demokratik birliginiñ başı Celil Esercep ve Romaniya parlamenti senatınıñ azası Nikolaye Moga tedbirni tantanalı sürette açtılar.

Festival keçken vaqıt devamında qırımtatar ansamblleri, sanatçılar seyircilerni milliy oyun ve türkülernen hoşnut ettiler. “Güldeste” ansambli
“Ağır ve Haytarma”,”Nazlı Yarem”, “Emir Celâl”, “Yüksek minare”, “Turnalar”, “Tım – tım” kibi oyunlarnı ustalıqnen icra ettiler.
Genç oyuncılar özleriniñ renk-a-renk elbiselerinen ve ustalıqlarınen kimseni lâqayd qaldırmadılar.

“Maqam” ansambliniñ yüksek professionallığını ise er kes ayrıca qayd etti.

Çalğıcılar Cemil Karikov (akkordeon), Nafe Bekirov (dare), Ferat Mametov (kemane), halq yırlarınıñ icracıları Afize Kasara ve Reyane Qadırova festival iştirakçilerine unutılmaz daqqalarnı bağışladılar. Festivalniñ soñunda sanatçılar diplomlarnen taqdirlendiler.

Romaniyada bulunğan künleri Milliy Meclis azaları Romaniya musulman türk-tatar demokratik birligi reisiniñ yardımcısı Samir Mennan ile beraber Köstencedeki musulman mezarlığını ziyaret etip, 2010 senesi vefat etken Romaniya musulman türk-tatar demokratik birliginiñ fahriy prezidenti Saladin Aciaqaynıñ ruhuna dua oqudılar. Aynı şu künü Qırım delegatsiyası Romaniya qıralı Karol Birinci 1910 senesi qurdurğan camini ziyaret etti.

Romaniyağa kelgenleriniñ birinci künü sentâbr 5-inde Romaniya musulman türk-tatar demokratik birligi reisi ve Qırımtatar halqı Meclisi tışqı alâqalar bölüginiñ başı Ali Hamzin Köstence televideniyesinde çıqışta bulunıp, 11 Bütündünya qırımtatarlar kongressiniñ keçirilmesi boyunca fikirlerini seslendirdiler. Ukrainada qırımtatarlarnıñ vaziyeti aqqındaki sualge Ali Hamzin vaziyetni aqsımlayıcı, diye tarif etti Ali Hamzin şunı qayd etti ki, Ukraina halqara standartlarda belgilengeni kibi insan ve milliy azlıqlarnıñ aqlarını qorçalav oğrunda talaplarğa riayet etmey, albu ki Avropa Birligi azası olmağa tırışqan devlet olarnı mıtlaqa eda etmelidir.

“11 Dünya qırımtatarlar kongressiniñ Romaniyada keçirilmesini müim strategik ğaye, dep bilem. Çünki Romaniya, Bulğaristan, Litvaniya ve Poloniyadaki qırımtatarlar birleşip, Avropa Parlamentiniñ ait qurumları vastasınen Qırımda halqımıznıñ ğayrıdan tiklenmesini teminleycek meselelerniñ çezimine siltem berirler. Bu – birinci nevbette tilimizni canlandıruv meselesidir. Ukraina akimiyeti bu işte yardım etmege istemey”, – dedi Ali Hamzin.

Halqara festival çerçivesinde daima küreş boyunca yarışlar ötkerile.

2010 senesi Dünya qırımtatarlar kongressi küreş yarışlarını festivalniñ programmasına kırımtatar halqı medeniyetiniñ ayırılmaz qısmı olaraq kirsetmek teşebbüsinen çıqqan edi.

Bu yılı festivalde Romaniya Sport nazirliginiñ vekilleri de iştirak etip, qırımtatar küreşi meselelerinen oğraşqan cemaat teşkilâtlarınıñ vekillerinen körüştiler. Qırım tarafını körüşüvde Qırım küreş federatsiyası prezidentiniñ yardımcısı Seydamet Yağyayev ve Meclis tışqı alâqalar bölüginiñ başı Ali Hamzin temsil ettiler.

Körüşüvniñ soñunda Romaniya sport nazirliginiñ vekilleri Romaniyada “Küreş” federatsiyasını resmen qayd etmek ve küreşni Romaniyada kütleviyleştirilgen sport çeşitleri sırasına qoşmaq zarurlığını qayd ettiler.