Ali Hamzin: «Gitler ve Stalin totalitar rejiminiñ qurbanları olğan qırımtatarlar ve Ukraina halqına qarşı pis provokatsiya»

24 December 2012

2012 senesi dekabr 21 künü Aqmescitte “Sut vremeni – Krım” adlı Rusiye teşkilâtı tarafından teşkil etilgen Stalin aqqında serginen bağlı provokatsiyağa muhtariyet akimleriniñ pozitsiyası taacüplendirdi. Qırımtatarlar sayesinde keçirilmegen bu vaqiağa olarğa pek çabuq seslendiler.

Birinciden, Qırım militsiya hadimlerine şeerniñ tam merkezinde böyle sergi keçirilmesine izin bergen vesiqalarnen tanışmaqnı tevsiye eter edim. Çünki, şunı qayd etmek ister edim ki, bu – sadece haber berip keçirmek mümkün olğan miting, numayış degil. Ekinciden, uquqkoruv organları (ebet, eger olar Ukrainanı temsil etip, onıñ menfaatlarını qorçalasalar) mezkür sergi Ukrainanıñ Stalinge nisbeten devlet siyaseti ne derejede uyğun olğanı ve ukrain halqınıñ taqdirinde onıñ rolüne nasıl qıymet kesilgeninen meraqlanmaq kerek ediler.

Belli ki, 2006 senesi noyabr ayında Ukrainanıñ “1932-1933 seneleri Ukrainada açlıq aqqında” Qanunı qabul etilgen edi. Bu vahşiyane cinayetniñ teşebbüsçisi ve icracısı olaraq İ. Stalin yolbaşçılıq yapqan kommunist rejimi tanılğan edi. 2009 senesi dekabr 25-te Ukraina telükesizlik hızmetiniñ baş taqiqat idaresi (№ 1-33/2010) “Açlıq boyunca mahkeme” cinaiy işni açıp, birinci kere iş 2010 senesi yanvar 12-13 künleri Kiyevde baqtı. Mahkeme Telükesizlik hızmetniñ Ukraina devletinde ukrain milletine nisbeten genotsid yapılğanı, yani ukrainlerniñ yoq etilmesi içün suñiy şarait yaratılğanı aqqındaki hulâsalarnı tasdiqladı.

Ukraina Cinayet kodeksiniñ 1-ncı qısmı 442-nci maddesi boyunca mahkeme bu cinayette SSSR yolbaşçılarınen bir sırada İ. Stalinni de qabaatlı dep tanılı. Lâkin qabaatlılarnıñ vefat etkenleri sebebinden 2010 senesi yanvar 13 künü iş qapatıldı. 1931-33 senelerde Ukrainada millionlarnen insanlarnıñ elâk olmasında cellât İosif Stalin qabaatlı, dep ilân etildi.

Uquqqoruv organlarınıñ yolbaşçıları degil de, muhtariyettekiler de Ukraina OSCE azası olaraq 2009 senesi iyül 3-te Parlament Assambleyası qabul etken “Bölüngen Avropanıñ qavuşması: insan aqları ve HH1 asırda OSCE regionında vatandaşlıq serbestliklerini taqdirlev” qararına qoltutqan ve onı amelge keçirmege söz bergeninden haberdar degiller.

Qararnıñ 3-nci maddesinde “yigirmindzji asırda Avropa memleketleri eki totalitar rejim – stalin ve natsizmniñ basqısına oğradılar”, dep qayd etile ve olar soyqırım, insan aqları ve serbestligini bozuvnı ketirgen cinayet içün cevapkâr olğanları aytıla.

10-ncı maddede ise “avgust 23 künü yani 70 yıl evelsi Ribbentrop-Molotov añlaşması imzalanğan künni ise stalinizm ve natsizm qurbanlarınıñ bütünavropa künü” olaraq ilân etilsin. Böyleliknen sovet kommunist rejimi Stalin ükümranlığı devrinde yapılğan cinayetler Gitler rejimi şaraitinde yapılğan cinayetlernen teñleştirildi.

Şu eki rejimden de pek büyük zarar körgen qırımtatarlar aynı şu sebepten er yılı avgust 23-te Qırımda hatıra tedbirleri keçirile.
Stalinniñ müsbet orbazını teşviq etmek maqsadında tüşünilgen sergi Ukrainanıñ OSCE devletleri ögünde halqara mecburiyetleri olğanı sebebinden de açılmamaq kerek edi. Çünki kendisini medeniyetli devlet olaraq köstermege tırışqan Ukrainada teşkil etilgen böyle tedbir bu mecburiyetler qaba bozulğanını köstere.

Bugünde-bugün kütleviy matbuat vastalarında sergi ziyaretçileriniñ “devletni pekitmek ve qudretini arttırmaq içün qattı ceza, atta ki millionlarnen qurban da ketirmek kerektir” degen fikirleri aks ettirildi. Bu – stalin ve natsizm qurbanlarınıñ hatırasını aqaretlemektir, cemiyette insanlıqqa zıt “degerlikler”niñ tiklenmesine alıp kelebilir. Bundan da ğayrı sergide Gitler ve Ribbentropnıñ resimleri de numayış etildi.

Sergi yolbaşçısı V. Mironovnıñ çıqışı ise milletler arasında qavğa çıqarmaq niyetinen provokatsion tüste edi. O, Stalinni açıqtan-açıq medh etip, qırımtatarlarnıñ sürgün etilmesini aqlayaraq, aqaret etti. “Serasker” pek doğru yapqan emiş. Sürgünlikniñ ilki bir buçuq yılı içinde halqımıznıñ yarısı, esasen qartlar, qadınlar ve balalar elâk oldı

BU SERGİ – TEK QIRIMTATARLARĞA NİSBETEN DEGİL, UKRAİNA DEVLETİNE, EKİ TOTALİTAR REJİMNİÑ QURBANI OLĞAN UKRAİN HALQINA DA QARŞI YAPILĞAN PİS PROVOKATSİYADIR.

Böyle serginiñ keçirilmesine yol bergen resmiy vazifedar şçahıslar istifağa çıqmaq kerekler.

Mezkür serginiñ keçirilmesi munasebetinen “Sut vremeni – Krım” adlı Rusiye teşkilâtı Aqmescit bölüginiñ faaliyetini teşkermek zarur. Cellât Stalin şerefine sergini keçirmek areketinden eki kün keçer-keçmez şu teşkilât vekilleri yarımadada qavğa çıqarmaq niyetinen daa da büyük provokatsion tedbirler ötkermek planlarını seslendirdiler.

Ali Hamzin,
Qırımtatar halqı Meclisi tışqı alâqalar bölüginiñ başı