Ali Bilge Cankorelniñ Qırımda elçilik faaliyetini aks ettirgen sergi açıldı

05 September 2012

İ. Gasprinskiy adına cumhuriyet qırımtatar kütüphanesinde 2012 senesi sentâbr 5 künü Türkiyeniñ Ukrainadaki sabıq Elçisi Ali Bilge Cankorelniñ Qırım ziyaretine bağışlanıp, onıñ Türkiyeniñ Ukrainada Elçisi olaraq çalışqanda faaliyetini aks ettirgen fotosergi açıldı.

Sergini Qırımtatar qadın-qızlar birleşmesi ve İ. Gasprinskiy adına cumhuriyet qırımtatar kütüphanesi birlikte teşkil ettiler. Qırımtatar qadın-qızlar birleşmesiniñ reisi Safinar Cemileva Ali Bilge Cankorel ve onıñ refiqası İclâl hanımğa ve bunıñ kibi de sergi açılışına kelgenlerge teşekkür bildirdi.

Safinar hanım Qırımtatar qadın-qızlar birleşmesiniñ faaliyeti aqqında ikâye etip, soñra sabıq Elçi Ali Bilge Cankorelniñ Qırım ziyaretinen bağlı videolevhanı seyir etmekni teklif etti. Cümleden musafirlerge Aqmescitte Türkiyeniñ Fahriy konsullığı açılışı ve Seyran Osmanov fahriy konsul olaraq tayinlengeni, Aqmescit rayonı Pionerskoye qasabasında suv ağlarınıñ açılışı ve daa çoq vaqialar numayış etildi.

“Türkiyeniñ Ukrainada Elçisi olıp hızmet etken Ali Bilge Cankorel Qırım ve qırımtatar halqı içün pek çoq iş yaptı, – dedi öz çıqışında kütüphane direktorınıñ muavini Leylâ Qadırova. – Onıñ faaliyetinden tek eyi teessuratlarımız qaldı.

Bugün onıñ işini devam ettirgenler aynı şu yönelişte çalışmaqtalar. Bütün bu işlerni fotolarda körmek mümkün. Bu özüne has tarihiy bir fursattır. Çünki, sergimizde cenap Cankorelniñ kendisinde bile olmağan resimler bulunmaqta. Biz sergimizde sayğılı elçimizniñ Qırımdaki faaliyetini köstergen bütün resimlerni toplamağa tırıştıq”.

Körüşüvniñ soñunda Safinar Cemilev Qırımtatar qadınlar birleşmesi adından musafirlerge hatire bahşışlarını taqdim etti.

Hatırlatamız ki, 2001 senesinden 2005 senesine qadar Türkiyeniñ Ukrainadaki Elçisi olğan Ali Bilge Cankorel Qırımğa defalarca resmiy ziyaretlernen kelip, Cumhuriyet yolbaşçıları ve Qırımtatar halqınıñ Meclisinen körüşti.

Ali Bilge Cankorelniñ qoltutuvı sayesinde Aqmescit rayonınıñ Pionerskoye köyünde, Aqmescit şeeriniñ Maryino-Ukrainka qasabalarında suv ağları açıldı.

Türkiye Cumhuriyetiniñ Qırımda Fahriy konsullığı meydanğa ketirildi. Cankorel çeşit sotsial-iqtisadiy ve milletlerara leyhalarda faal iştirak etti.