Aleksey Smirnov: «Qırımtatarlarnıñ areketi daa kenişçe olğan demokratik, uquqqoruv areketine belli bir siltem oldı»

19 Mayıs 2012

Sovet rejiminiñ siyasiy mahbüsi, Şimaliy Kavkaz halqları ve qırımtatar halqınıñ aqları içün meşur küreşçisi Aleksey Kösterinniñ torunı
Aleksey Smirnov öz çıqışında şunı qayd etti ki, ulu milletniñ Vatanğa qaytmaq oğrundaki küreşi üzlüksiz olıp, onıñ ögge ilerilevi 60-ncı yıllarğa doğru keldi.

“Bu – o devirniñ şiarlarına esaslanğan tınç küreş basqıçı edi. Qırımtatarlarnıñ areketi degen vaqia başlandı. Bu areket daa da kenişçe, umumiy, demokratik, uquqqoruv areketine belli bir tesir kösterdi”, – dedi A. Smirnov. Qırımtatarlarnıñ genç nesiline hıtap etken Aleksey Smirnov olarnı öz halqınıñ tarihını ögrenmege, sevmege ve ürmet etmege ve bunıñ kibi de öz aqları içün küreşniñ daa da semereli usullarını araştırmağa çağırdı.

“Bu sizge öz toprağıñıznıñ saipleri olmağa em de Mustafa Cemilev ve Refat Çubarov kibi liderleriñizge, bugün bizim bu mitingde bulunmamız içün özlerini qurban etkenlerge yardım etmeñizde yardımcı olur” – dedi uquqqoruyıcı A. Smirnov Bütünqırım matem mitinginde.

Malümat içün:  2012 senesi mayıs 18-de Qırımda Qırımtatar halqı öz tarihiy Vatanı Qırımdan sürgün etilgeniniñ 68 yıllığına bağışlanğan Bütünqırım matem mitingi olıp, onda 30 biñden ziyade insan iştirak etti