Ahtem Çiygoz: «Qırımtatarlar Kiyevge Mustaqillik meydanına aktiv keteler»

03 Dekabr 2013

Semetdeşler, regional ve yerli meclislerniñ reisleri ve azaları, Qırımtatar halqı Qurultayınıñ delegatları, bütün seviyelerdeki şuralarnıñ qırımtatar deputatlarınıñ diqqatına!

Soñki künlerde pek çoq semetdeşlerimiz Kiyevniñ Mustaqillik meydanında keçirilmekte olğan Ukrainanıñ Avropa integratsiyası yönelişine qoltutmaq içün barışıq aktsiyalarında iştirak etmek meselesinen Milliy Mecliske muracaat eteler.

Haber etemiz ki, Ukrainanıñ Avropa integratsiyası yönelişine qoltutmaq içün barışıq aktsiyalarında qırımtatarlar iştirakini idare etmek vazifesi Meclis reisiniñ muavini Ahtem Çiygozge avale etildi

Ahtem Çiygoz ile bağlanmaq içün telefon nomeri: 050 930 41 16

Kiyevde Mustaqillik meydanında Ukrainanıñ Avropa integratsiyası yönelişine qoltutmaq boyunca aktsiya devam etmekte.

Öz vatandaşlıq pozitsiyasını ifade etmege istegen qırımtatarlar teşkilâtlı şekilde Kiyevge ketmekteler.

Bu aqta Meclis reisiniñ muavini Ahtem Çiygoz bildirdi . Onıñ bergen malümatına köre Kiyevdeki Meydanda bugünde-bugün 100-ge yaqın qırımtatarı bulunmaqta.

“Kiyevge ketmek içün gruppalar teşkil etile, – dedi Ahtem Çiygoz. – Şimdi Meydanda Aqmeçet, Bağçasaray, Sudaq ve İslâm Terek rayonlarınıñ vekilleri bulunmaqtalar. Pek çoq qırımtatarlar narazılıq aktsiyasına qoşulmaq istegini bildirdiler. Qırımtatarlar Meydanda olduqça çlqluqnı teşkil etmege isteyler”.

“Biz Kiyevdeki Mustaqillik meydanına Qırım regionlarından mobil gruppalarnı teşkil etmege tırışamız”, – dedi Meclis reisiniñ muavini A. Çiygoz.

Şunı da qayd etmeli ki, Kiyevdeki Meydanda tınç aktsiyanıñ birinci kününden Kiyevdeki qırımtatar cemiyetiniñ vekilleri, bunıñ kibi de qırımtatar studentleri de bulunmaqtalar.