Ahtem Çiygöz Türkiyedeki AYDER halqara energetika forumında iştirak etti

23.01.2026

Keçenlerde Qırımtatar Milliy Meclisiniñ reisiniñ muavini, Ukrayina halq mebusı Ahtem Çiygöz Türkiyede keçirilgen AYDER halqara energetik forumında iştirak etti. Forum global energetik havfsızlıq meselesine bağışlanğan edi.

Öz çıqışı vaqtında Ahtem Çiygöz forum iştirakçilerini Rusiye Federatsiyasınıñ Ukrayina energetik astyapılarına yapqanı ücümler neticesinde Ukrayina energetik saasınıñ şimdiki vaziyeti aqqında haber etti.

Onıñ qayd etkenine köre, laf arbiy areketlerniñ yan aqibetleri aqqında degil, Rusiyeniñ Ukrayina ealisine qarşı añlı energetik terrorı aqqında kete. Böyle areketlerniñ maqsadı – Ukrayina halqını ve onıñ qarşılığını bozmaq ve Ukrayinanı qabul etilmez şaraitte teslim olmağa mecbur etmektir. Ahtem Çiygözniñ aytqanına köre, bu, Rusiye içün energetikanıñ silâ ve siyasiy basqı aleti olğanını daa bir kere tasdıqlay, halqara işbirlik saası degil, aynı zamanda bücetiniñ temeli olaraq qala.

Ahtem Çiygöz qayd etti ki, böyle şaraitte Rusiye iç bir devlet içün stabil ve işançlı energetik ortaq olamaz. Rusiye ile er bir energiya añlaşması – bu tek biznes degil, Ukrayina, Qara deñiz bölgesi, Avropa ve Merkeziy Asiyanıñ havfsızlığı ve istiqrarını bozğan cenkniñ maliye etilmesidir.

Öz çıqışında o, Qara deñiz bölgesinde energetik havfsızlıqnıñ müimligini ve Rusiyeni halqara uquq normalarına riayet etmege mecbur etmek kerekligini qayd etti:

“Qara deñizde energetik havfsızlıq pek müimdir. Rusiyege halqara uquq qaidelerine riayet etmege mecbur etmek kerek. Bu barışıq olmadan Qara deñiz bölgesi, Merkeziy Asiya ya da Kavkazda barışıq olmaz. Tek bir yolumız bar –  birleşip, bu terroristik devletni toqtatmaqtır. Ümüt etemiz ki, türk dünyası ve türk devletleri öz müim sözüni aytacaq, Ukrayina ve qırımtatar halqınıñ menfaatlarını qoruycaq ve Rusiye terrorını toqtatmağa yardım etecek.”

Ahtem Çiygöz qayd etti ki, Ukrayinada barışıq ve istiqrarnıñ ğayrıdan tiklenüvi – tek adalet meselesi degil, aynı zamanda bütün bölge içün turğun energetik keleceginiñ temin etilmesiniñ esas şartıdır, bu ise, terroristik devletni toqtatmaq içün halqara toplulıqnıñ umumiy ğayretini talap ete.