Acı Seitcelil İbragimovnıñ vefatı munasebetinen Qırımtatar halqı Meclisi ve Qırım musulmanları diniy idaresiniñ taziyesi

19 Noyabr 2013

Bismillâhi‘r-rahmani‘r-rahim

1992-1995 senelerde qırımtatarlar Vatanğa kütleviy qaytqan devirde Qırım musulmanlarınıñ birinci saylanğan müftisi acı Seitcelil İbragimov devamlı ağır hastalıq neticesinde 2013 senesi noyabr 18-den 19-na keçer gecesi Qazanda (Rusiye, Tatarstan) 53 yaşında vefat etti

Acı Seitcelil efendi Müftiligi Qırımnıñ tamır halqı öz yurtuna qaytqan mürekkep ve ağır bir devirge rastkeldi. O, Qırımda İslâmnıñ ğayrıdan tiklenmesine, birinci musulman cemiyetlerniñ qurulmasına, çekip alınğan camilerniñ musulmanlarğa qaytarılmasına, yañı camiler, birinci diniy mektepler açılmasına büyükten-büyük isse qoştı, tükenmez ğayreti ve hızmetinen bularnıñ episiniñ kerçekleşmesini temin etti. İslâmğa hızmeti ve yapqan hayırlı işleri Qırım musulmanlarınıñ hatırasından iç bir vaqıt silinmez.

Qırımtatar halqı Meclisi ve Qırım musulmanlarınıñ diniy idaresi acı Seitcelil İbragimovnıñ vefatı munasebetinen onıñ aqrabaları ve yaqınlarına, Qırım ve Tatarstan musulmanlarına teren taziyesini bildirip, baş sağlığı tileyler.

Kerçekten de epimizni Yüce Allah yarattı ve biz Onıñ qullarımız, kerçekten de Oña qaytırmız. Emir Allahtandır. Alla qalpleriñizni sabır ile toldursın.

Allah rahmet eylesin.

Qırımtatar halqı Meclisiniñ Reisi Refat Çubarov

Qırım musulmanlarınıñ Müftisi acı Emirali Ablayev

Malümat: 1992 senesi Seitcelil İbragimov Qırımnıñ qadısı olaraq tayinlengen edi. 1994 senesiniñ başında Qırım qadısı statusı Qırım musulmanlarınıñ müftisi, dep adlandırıldı. Müftiy vazifesinde acı Seitcelil efendi 1995 senesine qadar çalıştı. Soña Qazanğa köçip ketti. Tatarstanda o, ocalıq yaptı. Onıñ qarısı ve 8 balası qaldı.