Abduraman Egizniñ Avropa parlamentinde işi

15 Yanvar 2014

Strasburgda iş ziyaretinen bulunğan Meclis azası Abduraman Egiz Avropa Parlamentiniñ “Pan-Avropa iş gruppasınıñ” toplaşuvında iştirak etmekte. Toplaşuv devamında 2014 senesi yanvar 14 künü A. Egiz qırımtatar halqınıñ vaziyeti aqqında maruzanen çıqıştı bulundı.

Ziyaret devamında Abduraman Egiz Avropa Parlamentiniñ deputatları Bernd Posselt, Pol Rübik, tışqı alâqalar komitetiniñ başı Elmar Brok, Tunne Kelam, Antonio Kansian, Edvard Kukan, Yan Olbriht, Lazlo Tokeş, Emine Bozkurt, Enesa Vaydere, Zdravka Büjik, Elizabet Jegl ile körüşüvler keçirdi.

Körüşüv iştirakçileri qırımtatar halqı meselesiniñ çeziminde halqara cemaatçılıq tarafından körülecek çare ve sürgünlik aqibetlerini yoq etüvde Ukrainağa Avropa Parlamenti deputatlarınıñ iştiraki muzakere etildi.

Bunıñ kibi de körüşüvler vaqtında Qırımnıñ tamır halqı rastkelgen keçiktirilmeycek problemlerniñ çezimi oğrunda leyhalarnı amelge keçirüv imkânları da muzakere olundı.