Hreşçatıkta «QIRIM İÇÜN / Заради Криму» sergisi açıldı

12.05.2025

Mayısnıñ 12-nde, Bazarertesi künü, Kıyivniñ baş soqağında, Hreşçatıkta, Baş poçta yanında, Qırımtatar halqınıñ genotsid fedalarınıñ hatıra kününe bağışlanğan «QIRIM İÇÜN / Заради Криму» malümat sergisi açıldı.

Sergi Qırımtatar halqınıñ tarihınıñ esas basamağı aqqında – şekillenüvden zemaneviy zamanğa qadar, devletçilikten kolonizatsiyağa qadar, sürgünlikten qaytqanına qadar tarif ete.

Açılışta Qırımtatar Milliy Meclisiniñ reisi Refat Çubarov çıqışta bulundı. Öz çıqışında o, tarihiy kontekstke daldı, yüzlerce yıl devamında Rusiye tarafından Qırımtatarlarğa yapılğan basqı ve repressiyalar, ilhaq, qırmızı terror, sürgünlik, Vatanğa qaytmaq içün küreş aqqında hatırlattı ve şimdiki zamanğa qıyasladı:

“11 yıllıq işğal Qırımnı qorqu toprağına çevirdi. Rusiye, Ukrayina devletine sadıq qalğan insanlarnı, yani yüz biñlernen vatandaşlarımıznı bastırmaq içün elinden kelgenini yapa. 1944 senesi Şuralar Birligi tarafından yapılğan genotsid bitmedi ve Rusiye Federatsiyasınıñ işğal etilgen Qırımdaki siyaseti – bu genotsidniñ devamıdır, tamır Qırımtatar halqı, qavmiy Ukrayinler çıqarıla”.

Bundan ğayrı, Refat Çubarov halqara toplulıqqa muracaat etip, istilâcını raatlandırmadan, adaletli ve devamlı barışıq meselelerini çezmege mümkün olmağanını qayd etti.

“Barışıq içün memleketniñ bir qısmından vazgeçmege teklif etken er angi teklifler Qırımtatar halqı ve Ukrayina içün qabul etilmez. Biz inanamız ki, bu teklifler halqara toplulıq tarafından da qabul etilmeycek, çünki halqara uquqnı bozalar. Qırım – Qırımtatar halqınıñ vatanı, Ukrayina devletiniñ ayırılmaz bir parçasıdır, ve dünyada iç kimse Qırımnıñ taqdirini Qırımtatar halqı ve Ukrayinadan ğayrı, başqa çezmeycek”, – dep Meclis reisi bildirdi.

Serginiñ açılışı munasebetinen Ukrayina Prezidentiniñ Qırım Muhtar Cumhuriyetindeki Daimiy Temsilcisiniñ muavini Denıs Çıstikov ve Kıyiv-Moğıla akademiyasınıñ Milliy universitetiniñ Qırımşınaslıq merkeziniñ reberi Martin-Oleksandr Kıslıy çıqışta bulundılar.

Sergi bir ay devamında çalışacaq.