2014 senesi kiçik aynıñ 20 künü – silâlı istilâ başlağan künü, RF Silâlı quvetleriniñ Keriç boğazı rayonında Ukraina devlet sıñırını qanunsız keçüvi ve Qırımdaki arbiy bölüklerini ukrain arbiy qısımlarını blok etmek içün qullanuvı qayd etilgen edi. Daa soñra bu tarih Ukraina qanunlarında qayd etildi, Rusiye Mudafaa nazirliginiñ “Qırımnıñ qaytarılması içün” medalinde de bar.

2014 senesi kiçik aynıñ 23 künü – Aqyarda Rusiye tarafdarlarınıñ eñ büyük mitingidir. Tribunadan ilk sefer ukrain akimiyetini tanımamaq çağıruvları çıqtı, Aqyarnıñ “halq şeer yolbaşçısı” olaraq Rusiye iş adamı Aleksey Çalıy “saylandı”. Aynı şu künü Moskvada, Ukrainanı üç qısımğa bölmege,  Rusiye “gönüllülerini” paytahtı Harkiv olğan “Malorossiya”nı (“Küçük Rusiye”ni) ilân etmege çağırğan miting olıp keçti.

2014 senesi kiçik aynıñ 23-nde saba Aqyarda, 1918 senesi kiçik aynıñ 23-nde bolşevikler tarafından Qırım Halq Cumhuriyeti Ükümetiniñ yolbaşçısı Noman Çelebicihan asılğan sabıq apishaneniñ binası yanında qırımtatarlarnıñ onıñ hatırasına matem mitingi olıp keçti. Matem mitinginde qırımtatar milliy bayraqlarınen beraber Ukraina devlet bayraqları köterildi. Mitingniñ soñunda iştirakçiler Aqmescitke yol aldılar, anda saat 13:00te siyasiy ve devlet erbabı, birinci Qırımtatar Milliy Qurultayınıñ teşkilâtçılarından biri, Qırım Halq Cumhuriyeti ükümetiniñ yolbaşçısı Noman Çelebicihan (1885 – 1918 senesi kiçik aynıñ 23 künü) hatırasına ve Rusiye tarafdarı olğan separatizmge qarşı 15 biñlik miting başlandı.

2014 senesi kiçik aynıñ 24 künü – Soçi Olimpiadası keçirilgen rayonda deñiz akvatoriyasını qorçalağan RusiyeFederatsiyasınıñ Arbiy deñiz quvetleriniñ gemileri, memuriy binalarnı zapt etmek, Qırım MC ve Aqyarda ukrain arbiy qısımlarını blok etmek içün qullanılğan Rusiye arbiy hızmetçileriniñ bölükleri ve arbiy tehnikasını Novorossiyskte gemige aldılar ve Aqyarğa doğru yol aldılar.

2014 senesi kiçik aynıñ 26-nda – Qırım Muhtar Cumhuriyetiniñ Yuqarı Şurası ögünde mitingler: biri – Rusiyege qol tutqan ve Rusiye terkibinde muhtariyet talap etken teşkilâtlarnıñ mitingleri (tahminen 2 biñ iştirakçi), ekincisi – Ukrainanıñ topraq bütünligini qorçalamaq içün 12-15 biñ insan, esasen qırımtatarlar ve qavmiy ukrainlerniñ iştirak etkerleri, Qırımtatar Milliy Meclisiniñ qararına binaen çağırılğan miting. Qırım Muhtar Cumhuriyeti Yuqarı Şurasınıñ sessiyasınıñ keçirilmesini toqtatıp oldılar, anda Rusiye tarafı onıñ Ukrainadan ayırılması ilân etilecek edi.

2014 senesi kiçik aynıñ 27 künü – Rusiye arbiyleri Aqmescitteki QMCniñ Yuqarı Şurası ve QMCniñ ükümetiniñ binalarını zapt ettiler.

2014 senesi kiçik aynıñ 27-nde – Qırım MCniñ Yuqarı Şurası RF Silâlı quvetleriniñ 31-inci desant-ücüm brigadasınıñ Rusiye arbiy hızmetçileriniñ avtomatları altında “Qırım statusı aqqında referendum”nıñ keçirilmesi içün rey berdi, “Russkoye edinstvo” (“Rusiye birligi”) firqasınıñ temsilcisi Sergey Aksönovnı Qırım ükümetiniñ yolbaşçısı olaraq tayin etti. Rusiye Silâlı quvetleriniñ bölükleri yarımadada ukrain arbiy qısımları ve obyektlerini blok eteler. Kiçik aynıñ 27-nden 28-ne keçer gecesi Aqmescit ve Belbek ava limanları, Qırımğa Herson vilâyetinden kiriş blok etildi. Aynı şu künü Rusiye Federatsiyasınıñ Cenübiy arbiy bölüginñi ordularınıñ arbiy azırlığı teşkerildi, oña 150 biñge qadar arbiy, 90 uçaq, 120 vertolöt ve 880 tank celp etildi.

2014 senesi saban ayınıñ 1 künü – Rusiye Federatsiyasınıñ prezidenti V. Putin Rusiye Federatsiyasınıñ Federal toplaşuvınıñ Federatsiya Şurasına “Ukraina toprağında bulunğan Rusiye Federatsiyası vatandaşları, semetdeşleri, Rusiye Federatsiyasınıñ silâlı quvetleriniñ arbiy kontingentiniñ hadimleriniñ ayatına telükelerni yoq etmek içün” Ukrainağa Rusiye ordularını kirsetmek teklifini yolladı. Federatsiyanıñ Şurası teklif içün bir ağızdan rey berdi. Aynı şu künü Rusiye ücüm bölükleri Rostov, Voronej, Kursk, Belgorod, Brânsk vilâyetlerinde yerleştiler. Polissâ, Slobojanşçına, Donetsk ve Qırım operativ yönelişlerinde, 2014 senesi mayıs ayınıñ soñuna qadar Ukrainağa istilâğa qadar tolu arbiy azırlıqta olğan ücüm gruppası teşkil etildi.

2014 senesi saban ayınıñ 3-nde – Aqmescitteki Nazirler şurasınıñ binasına  Reşat Ametov Rusiye ordularınıñ Qırım işğaline qarşı bir kişilik piketnen çıqtı. Daa soñra onı meydandan “Qırım öz-özüni mudafaası”nıñ vekilleri alıp kettiler ve bu vaqia, nezaret kameralarında qayd etildi. Reşat Ametov kimsenen bir daa bağlanmadı. Saban ayınıñ 15-nde Aqmescitten 60 km uzaqlıqta yerleşken Qarasuvbazar rayonınıñ Ortalan köyünde ölü tapıldı. Adamnıñ bedeninde azap izleri bar edi, başı skotçnen bağlı edi, közleri qırılıp çıqarıldı, yanında ise buğavlar bar edi.