Refat Çubarov Qırım ormanlarında kezinti içün para alınğanına qarşı

21 Iyün 2013

Qırım Yuqarı Şurasınıñ deputatı, Meclis reisiniñ birinci muavini Refat Çubarov Qırım ormanlarınıñ “şifalı hususiyetlerinden faydalanmaq içün” fiyat qoyulğanını tenqid etti.

Öz fikirini deputat Qırım Yuqarı Şurasınıñ iyün 21-de olıp keçken toplaşuvında “Ekinci dereceli orman malzemelerinden, ormannıñ faydalı hususiyetlerinden qullanmaq içün mahsus fiyatlar belgilemek aqqında” meselesi muzakere etilgende seslendirdi.

“Bizim ükümetimiz cemaatnı taacüplendirmekten bezmey, bir betmen elinde “bolgarka” ile çapqalap, qanunsız qoyulğan tosuqlarnı kesken zamanda, ekincisi kene de qanunsız qurulğan binalarnı buldozernen tegizley, üçüncisi ise şu ekisi işsiz qalmamasını teminlegen qararnı qabul etmekni teklif ete, – dedi deputat Qırım parlamenti minberinden çıqışta bulunırken. – Qarar daa qabul etilmeden endi bu mehanizmni amelge keçirmek areketleri Bağçasaray rayonında yapıldı. Endi bir tasavur etiñiz, yolları orman içinden keçken köy sakinleri evlerine nasıl qatnaycaqlar. Zanımca, soñki vaqıtta bu leyhalarnı azırlağanlar para toplamaqnıñ yañı yolları ve usullarını araştıruvnen meşğuller. Amma nasıl para ve qaydan alınacağı añlaşılmay. Biz bugün daa yañı, lâkin ne işlernen oğraşacağı bellisiz, cumhuriyet müessiselerniñ açılmasınen bağlı diger tekliflerni de baqacaqmız. Bu fiyatlar belgilengeni neticesinde 80000 grivnâ toplamaq közde tutula. Amma memurlarğa ne qadar sarf etilecek, kim memurlıq yapacağını bizge söylemeyler. Böyle para içün mahsus qarar alınacağını tasavur etiñiz, soñra kendi firmalarına bu para cıyuvlarnı teşkil etmek imkânı berilecek. Rus tili pek zengin ve dülber til. Men bu qararnı oqurkenim, ğayet duyğulanam. Nasıl etip şu vesiqa işleyicileri bizim diqqatımıznı çette qaldırmaq usulını tapalar. Ya özüñiz baqıñız nege para almaq teklif etile: “ormannıñ şifalı hususiyetlerinden medeniy-sağlamlaştıruv, rekreatsion, sport, turistik ve tasil, terbiyeviy maqsadlarda ve ilmiy-araştıruv işlerini keçirüvde faydalanmaq içün”. Ormannıñ şifalı hususiyetlerinden faydalanmaq. Ya ne bu şifalı hususiyetlerni Yüce Rabbimiz degil de, ükümet yarattımı yoqsa? Endi nege ve ne qadar para alınacağını oquñız: piyade ve ayaq maşinasında kezintiler içün. Deyik, yarın sizge yaqın aqarabañız, ya da bir yaqtan musafir kele, siz ise ormanğa yaqın bir yerde yaşaysıñız. Siz musafiriñiz ile beraber ormanğa barıp olamazsıñız, çünki onıñ “şifalı hususiyetlerinden faydalanğan olursıñız”. Bu qararnı artıq talil etmek istegim yoqtır. Amma istek ve imkân oldı ise, bir tüşünip baqayıq da, cemaatımızğa bu ne bere”.

“Bunıñ içün vaqıt kerek, men menden evel seslendirilgen tekliflerge qoşulam. Lütfen bu qararğa qoltutmañız! Onı red etiñiz, dep olamaz, albu ki böyle yapmañızğa çağırır edim.

Amma böyle iş kerek, dep oylasañız, çoqlarıñız tasdiqladığıñız şu ükümetten talap etiñiz ki, bizni qıynamasınlar. Bu qarar degil, bu – sadece, yañı ayın-oyunnıñ üstüni qapatacaq bir kâğıttır”, – dedi Refat Çubarov.

Bu çıqıştan soñ mesele reyge qoyuldı. Teklif olunğan leyha içün cedvelge alınğan 72 deputattan 57-si rey berdi. Leyha qabul etilgen künü Qırım parlamentiniñ resmiy saytında qararnıñ metni yoq edi.

Кримськотатарське питання online