Refat Çubarov: “Bugün, Kırım hükümetiniñ baş vazifesi – aralarına şına qaqmaq maqsadında qırımtatarlarnı olduqça yoldan şaşırtmaq olğanında bugün iç kimse şübelenmey»

29 May 2013

Mayıs 29 künü Aqmescitte Milliy Meclis ofisinde Meclis reisiniñ birinci muavini Refat Çubarov, AQŞnıñ Ukrainadaki Elçiliginiñ ekinci kâtibi Stiven Peyc ile körüşti.

Körüşüvde Meclisni Tışqı alâqalar bölüginiñ müdiri Ali Hamzin ve Kâtibiyet başı Zair Smedlâyev temsil ettiler.

Qırımtatar halqınıñ bugünki vaziyeti boyunca sualge cevaplanaraq Refat Çubarov Qırım akimiyetiniñ qırımtatarlarnıñ vekâletli organı – Milliy Meclis ve şekillendirdigi organlarğa qarşı fesatınıñ muntazamlığını qayd etti. “Bugün, Kırım hükümetiniñ baş vazifesi – aralarına şına qaqmaq maqsadında qırımtatarlarnı olduqça yoldan şaşırtmaq olğanında bugün iç kimse şübelenmey”, dedi Refat Çubarov. – bundan da ğayrı, qırımtatar halqınıñ vaziyetini eyileştirecek er angi teşebbüslerge mania etile, cümleden halqara teşkilâtlar tarafından maqullengen Halqara forum keçirilmek ğayesine iç bir türlü qoltutulmay.

Refat Çubarov Ukraina Prezidenti yanındaki Qırımtatar halqı vekilleriniñ keñeşini şekillendirüv printsipleri aqqında da aytıp, keñeşke vekiller seçilmeden, sovetler devrindekisi kibi tayinlengenini qayd etti. Bu ise halqara uquq normalarına, cümleden BMTniñ tamır halqlarnıñ aqları boyunca deklaratsiyağa tamamile zıttır.

Refat Çubarovnıñ fikrince Ukraina Prezidenti yanındaki Qırımtatar halqı vekilleriniñ keñeşini şekillendirüvge böyle yanaşuv akimiyetniñ qırımtatar halqınen qonuşmasını imkânsız qaldırdı. “Bes-belli bugün akimiyetniñ kendisi de vaziyetni ögü qapalı yolğa soqqanını añlap başladı. Biz ise evelkisi kibi halq ve devlet menfaatlarından kelip çıqaraq semereli dialognı tiklemege azırmız. Amma top akimiyet elinde….”, – qayd etti Refat Çubarov.

Körüşüvde bunıñ kibi de 2013 senesi mayıs 18 Bütünqırım Matem mitinginiñ qararına kirsetilgen meseleler de baqıldı. Refat Çubarov qararnıñ bütün talapları, şu cümleden Ukraina Prezidentine Qırım Baş naziri Anatoliy Mogilövnıñ deñiştirilmesi aqqındaki muracaat da, Kiyevde qanaatlendirilecegine ümüt bildirdi. “Bu pozitsiyanı Qırımnıñ tamır halqınıñ sesi olaraq qabul etmek kerek. Muhtariyetniñ icra akimiyeti başında Qırım promblemlerini keregi kibi añlağan, idare saalarına qırımtatarlar arasından professional kadrlarnı celp etmek kerekligini bilgen, insan ketirilmeli”, – dedi – skazal Refat Çubarov.

Körüşüvde Rusiyeniñ Aqmescitteki baş konsulı Andreyevniñ çıqışı neticesinde olğan vaziyet de muzakere etildi. Rusiyeniñ baş konsulı qırımtatarlarnı aqaret etti, dedi Refat Çubarov. “O, tek aqaretnen sıñırlanmadan, sözlerini aşalayıcı bir şekilde seslendirdi. Tabiiy ki, biz eñ tez zamanda onıñ Qırımdan çağırılmasını bekleymiz. Zira, Rusiye meyilli separatist küçlerge qoltutuvda Andreyevniñ missionı bizge belli”, – dedi R. Çubarov.

Stiven Peyc mündericeli subet ve berilgen malümat içün teşekkür bildirdi. “Bizim elçimiz Kiyevde olğan çeşit körüşüv ve brifinglerde iştirak etti. Halqara forum keçirilmek ğayesine o tolusınen qoltuta. Añlaşıla ki, siz etnik gruppa olaraq problemlerni çezmek kerek olğan ükümette, bizneste ve diger saalarda yeterli derecede temsil etilmegensiñiz”, – dedi AQŞnıñ Ukrainadaki Elçiliginiñ ekinci kâtibi Stiven Peyc.

Refat Çubarov öz nevbetinde “Halqara forumnıñ keçirilmesi Ukrainanıñ halqara itibarını arttıracaq, onıñ pozitsiyalarını pekitecek ve Avropa cemiyetine qatılması içün keniş imkânlar yaratacaq, Avropa halqları ailesiniñ toluqanlı bir azası olaraq inkişafını tezleştirir”, dedi.

Meclisniñ Tışqı alâqalar bölüginiñ başı Ali Hamzinniñ fikrince Ukraina sürgünden qaytqan qırımtatarlarnıñ problemlerini çezüvde yardımğa muhtac olğan bir vaqıtta Meclis demokratik Ukraina devleti şaraitlerinde qırımtatar halqınıñ aqlarını tolusınen tiklev oğrunda açıq ve er keske añlayışlı siyasetni alıp bararaq halqara teşkilâtlarnen işbirlikni devam etecek.

Körüşüvde taraflar Ukrainada insan ve halqlarnıñ aqlarını qorçalav saasında birlikte iş alıp barmaq yolunda teklif-tevsiyelerde bulundılar.